高海寧 昨日（15日）跟媽媽、兩個弟弟為爸爸慶生，她嘟起嘴跟爸爸合照，又留言道：「我的家人真的很可愛，是福氣，也是幸運，和你們在一起，坐著就很開心，有你們的地方就是家。」又笑言自己很像媽媽，很喜歡皺鼻子是遺傳媽媽。現年34歲的高海寧，工作向來不錫身，毫不吝嗇大晒豐滿身材，是不少人心中的性感女神。現實中她是個孝順女，她永遠把家人放在首位，一有時間就會陪家人！
孝順女高海寧圓媽媽夢想參選港姐
高海寧在南京出生，而父母在港靠做小販，於女人街擺檔賣銀器養起頭家，所以她由外婆湊大。雖然父母不在身邊，但親戚朋友都很疼愛她。由於寄人籬下，所以她自小很懂事，每次放學回家都會自動自覺做功課，小時候成績還很好。14歲時，她回港升中，終於可以和家人一家團聚，居於旺角女人街一座大廈的天台屋，中五會考更考獲22分佳績，做過學生會副主席。
高海寧是參選港姐入行的，原來她原本是不願意參選。她指媽媽兒時的夢想是做歌手，大概由17歲開始，媽媽就跟她說：「女兒，參選港姐吧！」，每年不斷重複，直到2008年父親也加入游說的行列，叫她嘗試一次。她坦言真的不想參加，因為她認為很多佳麗也是從海外回港，假如落選也可以回到原居地，總之有很多因素令她卻步。但最後她為了圓雙親的夢想，便放手一試。
心痛爸爸做小販養家 憑實力漸漸捱出頭
2008年，高海寧參選香港小姐入行，至今已經13年。惟剛入行，她的收入微薄，父母依舊要在女人街擺檔搵食，爸爸試過涉嫌賣假銀器而被海關拘捕，搞到她很自責同心痛：「我覺得自己做極都養唔到屋企人，我好想父母唔使再喺女人街擺檔，夏天太熱，女人街咁焗成四十度都有，太辛苦啦！」
《婚姻合伙人》是她首次擔任女主角、飾演地產經紀貝競枝（Kimchi），是一個進取女人，既貪錢又自私，不少人都大讚高海寧在劇中發揮得好好，入形入格。於《金宵大廈》飾演怪獸家長小惠，對兒子期望甚高，結果兒子不堪壓力自願留在異空間，最終在強烈悲痛下被鴉烏洗走對兒子記憶，拍喊戲都十分自然，被觀眾激讚。
高海寧付5位數家用又供弟弟讀書買樓放租收入贈母
高海寧把家人放在首位，每月給父母五位數字家用，而且自開始賺錢後，便替弟弟支付學費及生活雜費，又幫他們報讀遊學團，付全數旅費：「屋企有兩個細佬讀緊書，又要供樓、供車，我會努力養起頭家！」每逢大時大節，她都一定將時間留給家人，聚埋一齊食飯，更不時於網上分享家庭照，非常孝順。
2015年她斥資約526萬，購入油塘新盤Peninsula East一個522呎中層兩房單位與父母同住，當時她花上約105萬付首期。屋苑的管理費亦非一般的貴，比當初預期的高，要逾每方呎4.1元，她直言壓力大。現時她已將單位放租，租金收入全數贈母。
她的上車之路不易，足足儲了七年錢才完成心願。她曾經話，她一家人都不太會投資，又覺得風險很大，所以儲錢買樓：「買樓呢樣嘢係我阿媽由細到大灌輸我嘅一個思想，因為我唔識投資，買磚頭好似係最穩陣。我媽咪爹哋後生好辛苦咁捱，都捱到兩層樓，所以當我有錢，我就儲首期買樓。」她指初時她想買大屋，後來發覺「上車」愈來愈難，惟有買間細。她慶幸自己做了這個決定，因為現在依家樓價又升了。她指現在很想快點供完樓，或者儲筆錢再買多間，要有動力。
另外她時常惦念遠在南京的婆婆，就算要拍劇的時候都會趁空檔跟婆婆視像通話。放假時，更加會飛返去南京探婆婆，每次婆婆都會煮很多小菜給她吃，難怪她曾留言說：「每次回來都要胖幾斤，外婆家太好吃好住了。」仲話見到婆婆的笑容就乜都值得。
不論兒時或現在，她都同樣愛錫婆婆，就如她所說，二人的確是「彼此的一生中最愛」。每次一談起外婆，她總顯得特別感性：「你陪我長大我陪你到老」，亦祝福婆婆健健康康，可以繼續陪著她，這份跨越兩地的婆孫情實在教人感動。
高海寧選港姐患抑鬱
問：會唔會成日諗番如果十年前選美嗰陣，邊個環節表現唔同，賽果都會唔同？
答：我參選嘅時候其實壓力好大，因為有好多負面嘅新聞，但當時因為細個、唔識得去處理呢方面嘅情緒，就會覺得點解全世界都唔鍾意我呢？所以喺選嘅過程中，我係曾經患過抑鬱症，我試過突然間肥咗好多，每日不停食嘢，困自己喺屋企喊，仲要唔想畀爹哋媽咪知，因為係媽咪叫我參選。佢見到我咁，都好唔開心，我喺沖涼嗰陣喊，因為肥咗好多，每日起身又要跑步，有好多情緒上嘅嘢。
當時處理得好差，淨係想快啲選完，覺得係一個解脫。我的確冇選中，選完我見到好多姊妹喺後台度喊，但係當時我無喊，當時嘅反應就係：「終於都完咗嘞！」覺得我終於都完成咗呢件事，所以你問我覺得賽果點，或者當時希唔希望自己有好好嘅表現，我覺得全部都係整定，我唔會諗番話如果攞到冠軍就好喇，反而我係由低做起，一步、一步，成長到依家，每一步經歷嘅嘢，都係有得著嘅。
問：08年你選港姐落選，但無綫簽你做藝員，算唔算塞翁失馬，焉知非福？
答：嗰陣選完都迷茫嘅，因為唔知自己究竟想要啲咩，當時公司畀咗offer我，我係好開心，起碼呢條路我仲有得選擇行落去。都有同屋企人討論過，因為我書未讀完，未讀完大學，當時諗不如趁後生試咗先，就簽咗，都好好彩，即刻就有好多飲食節目、旅遊節目畀我拍。當時比較少拍劇，對於嗰個年紀嘅我易Handle啲，因為演技需要時間、需要人生嘅一啲經歷先會易上手啲。玩、食對一個廿零歲出頭嘅女仔嚟講會Easy啲，所以當時都好Enjoy，做做下就做咗咁多年嘞。
高海寧被標籤性感 幸得家人理解與支持
問：家人有無介意你行性感路線？
答：對於我爹哋媽咪嚟講，我永遠都係佢哋個女，佢哋無介意過我行性感，因為佢哋知我唔係一個大家外表上望到嘅女仔，因為性感呢個形象可能令好多人誤會我係壞、私生活唔檢點，或者鍾意釣金龜。但我爹哋媽咪好清楚我係一個點嘅女仔，我亦都用行動去證明畀大家睇我係一個點嘅女仔。所以當我遇到奇怪嘅新聞，我爹哋媽咪會同我講：「阿女唔使理，做好自己，遲早有日會睇到嘅！」當出面遇到好多壓力，淨係得屋企呢個地方令我最舒服。
問：大家都將注意力放喺你嘅身材上，你覺得有無壓力？
當然有啦，我得到大家嘅注意力，諗起高Ling就諗起性感，但亦同時間限制咗我嘅演藝生涯好多、好多年，近年因為田蜜(《不懂撒嬌的女人》)或者《使徒行者》，一啲好嘅角色令到大家對我印象開始扭轉，監製開始會畀機會我，畀啲重戲份啲或者有得發揮嘅角色畀我，好衷心多謝佢哋。
大眾將我同白健恩嘅強姦戲放大，在於我嘅立場，我梗係唔開心啦。嗰套劇之前我好多角色都係客串小三、狐狸精，監製同我講佢睇我嘅飲食節目，見到我講起婆婆嘅一段說話，Feel到我內心有其他嘢可以畀人發掘，所以願意畀機會我，但外界只會將性感放到好大，所以我嗰套劇所有嘅努力都比嗰場戲冚晒，就係嗰刻我開始諗係咪要收起性感。
收起性感後，成效係點？
有好多唔同嘅聲音，有人會話：「大家都覺得你係性感嘅，依家好多女仔都願意性感去引起人注意，點解你要收起啫？你會少咗好多工作機會。」但我覺得每個人都會有個階段，我知道性感可以令我得到好多工作機會，但我希望我可以跨過呢個階段，去下一個階段，得到唔好再咁性感嘅工作機會，我唔介意有一段時間我可能會失去一啲Job或者角色，因為唔跨過，永遠都唔會有進一步嘅路、行得再遠啲。
初入行全副身家得六百蚊 死頂不想父母知道辛酸
問：有無捱過麵包同經歷低潮？
梗係有捱過麵包啦，話你聽一個秘密，諗番都對徐淑敏（現名徐菁遙）唔係咁好意思。當時(09年)佢結婚，我啱啱選完港姐，我戶口真係得番六百蚊，佢請我去飲，我都知道人情其實大概要1,000至1,500蚊，但我真係得600蚊，我將我成副身家畀晒佢做人情，當然佢唔會話我畀得少，但我心入面知道係好少。
我都有試過捱，因為啱啱選完港姐，收入係好低、好低，都係靠爹哋媽咪幫補吓，但我都唔想靠佢哋咁多，因為佢哋都壓力大，我仲有兩個細佬，我爹哋媽咪又要供樓，佢哋喺女人街做嘢都辛苦，所以嗰時問我夠唔夠使，我都話我OK呀，都盡量慳，嗰時搭地鐵，盡量將使費減到最低。
外界覺得我無經歷過低潮，其實我覺得我好彩嘅，我入咗行之後，因為去咗《美女廚房》個Trip，開始好多客戶搵我做嘢，贏得知名度同好多工作嘅機會，但都有好多係我失去咗嘅嘢。例如我需要用更加多嘅努力先可以證明畀大家睇我有嘅唔只係身材，呢樣係我到依家都仲喺度Fight緊，個角色有少少性感，我所有嘅努力就無晒㗎喇，大家淨係會睇到我泳池嗰場戲係點，其他無論點努力去演繹喊戲、傷心各樣嘢，無人會睇到㗎！呢個就係有得必有失。
高海寧覺得愛情重要過錢
問：有傳你受殼王陳國強、王晶得寵後失寵嘅傳聞，你用咩心態面對？
除咗呢啲新聞之外，有時啲連個人物都冇，得個剪影，就話我畀富商A搞掂咗，我心諗你都畀啲誠意吖，得個黑影都可以作篇新聞。開頭我好介意，因為我好清楚我係幾咁腳踏實地嘅人，我亦都唔係貪錢嘅人。
晶哥好錫我，晶哥係有畀好多機會我，我會唔會因為呢啲新聞而唔要呢啲演出機會？我唔會，因為我拍劇嘅機會唔多，所以每個角色我都做好佢，至於同公司老闆嗰啲傳聞，其實由頭到尾無人影到張相，我同佢嘅接觸，都係每年台慶，佢喺台上，我喺台下，連打招呼嘅機會都無。
問：你有無結婚生仔嘅時間表？
答：細個覺得22歲結婚，25歲生BB。我身邊嘅朋友開始結婚、生仔，我開始檢討自己。我21歲入行，我入行後嗰八年，完全係工作，未試過好好Enjoy拍拖係咩一回事，我好想做一個真真正正嘅人。我好鍾意小朋友，依家就覺得我一定會結婚，我係結婚之後重心會擺喺屋企嗰啲女仔。一定會生BB，會畀心機照顧我嘅丈夫同小朋友，但幾時就順其自然，發生嘅時候我會同大家講。
我信緣份，我亦信感覺，我好渴望嗰種觸電嘅感覺、愛情嘅感覺。有句說話「你鍾意喺寶馬入面喊，定踩住單車笑」我會揀坐喺單車後面笑。你畀好多錢我，但未必會喺身邊陪伴我，我係唔得。我好需要溝通、陪伴，好Enjoy做小女人。我爹哋媽咪到依家都好Sweet，拖住手食飯，呢樣嘢好影響我，所以我憧憬好美好嘅婚姻生活。
愛情對我嚟講係緊要過任何嘢，如果佢好愛我，我又好愛佢，我係唔介意一齊去捱。由細到大，我都鍾意好成熟嘅男仔，爹哋媽咪保護得我好好，變相唔係好識點去處理人際關係，我希望我另一半可以教識我好多嘢，我會好崇拜、好倚賴呢個人，畀我感覺無論遇到咩事佢都可以幫我孭上身、幫我解決。
問：你咁享受拍拖，點解唔公開？
我覺得拍拖係兩個人嘅事，或者係兩個家庭嘅事，但當我哋係公眾人物，好多嘢都要喺鎂光燈下面，我唔希望有其他任何嘅壓力去影響，呢個係兩個人嘅共識，到係時候、有好消息，我會接受大家嘅祝福。
圖片來源：高海寧Instagram，高海寧weibo
留言 1
xxx46709394
愛情重要過錢。。。然後下面就說買樓
我明的
2019年05月27日06:11
顯示全部