Pokémon Go世界冠軍｜前領隊撰文致謝黎青龍支持　「個冠軍黎教授有份」

香港16歲選手鄭業楷（蝦皮）早前在《Pokémon GO》世界賽中奪冠，登上「世一訓練員」寶座。Pokémon GO香港隊前領隊張樂行（Sam）在社交平台撰文，揭喜愛Pokémon GO的肝病權威黎青龍教授，原來是勝利背後的無名英雄！

Sam在文中細說與黎教授的故事，原來黎教授上年曾贊助一萬元讓Pokémon GO香港隊到外地參賽，即使港隊最後小組出局，但黎教授沒怪責，更送上暖心鼓勵：「輸咗唔係咁大件事。繼續打，一定會考第一嘅！」，表示希望香港隊將來會贏。

Sam：黎教授嘅故仔，我好似無同任何人講過。 舊年，我寄咗封信畀黎教授。內容大致係話香港隊好有機會成為世界第一。隊中有細路仔，有人要兼職搵旅費，所以希望佢贊助我哋。 過幾日，佢就打畀我：「阿 Prince（無錯，教授叫我做…

Posted by English Lesson for Freedom on Wednesday, August 21, 2024

Sam Facebook全文：

「Sam：黎教授嘅故仔，我好似無同任何人講過。
舊年，我寄咗封信畀黎教授。內容大致係話香港隊好有機會成為世界第一。隊中有細路仔，有人要兼職搵旅費，所以希望佢贊助我哋。
過幾日，佢就打畀我：「阿 Prince（無錯，教授叫我做 Prince），唔好意思啊，我而家減咗薪，收入少咗。我呢到得唔係好多錢，得一萬蚊。唔知夠唔夠呢？」*
*補充：因為黎教授要減薪，先可以繼續以榮休教授嘅身份工作，否則要強制退休。
我無諗過教授會畀咁大筆錢支持我哋呢班佢三唔識七嘅人。我不停講多謝。
佢打斷我，話：「不過呢，我老人家，唔識得用你哋年青人啲電子支付。陣間我收咗工，即刻跑去銀行過錢畀你，唔知你介唔介意呢？」
我以為佢話「跑」係講笑。點知，如果我無記錯時間，佢大約 17:03 就過咗數。佢應該真係跑去銀行，而且跑得好快。
請大家代入我當時嘅心境：我係日日搵贊助都被人鬧、被人笑、被人無視。只有黎教授同另一位郭大維老闆向我哋投下信任一票。雪中送炭，我呢世都會記住。
結果，我哋小組出局。佢無怪責我哋，仲鼓勵我哋「輸咗唔係咁大件事。繼續打，一定會考第一嘅！」然後再文字補多個信息我哋：「I sincerely hope the HK team will win in the future!（希望香港隊將來會贏！）」
喺比賽會場，有會場限定嘅精品店。裡面所有產品，只會喺會場發售，外面買唔到。買手信畀教授係最開心而且最容易。因為我知道佢樣樣都啱。毛公仔佢啱、膠公仔佢又啱、衫褲鞋襪、鉛筆擦膠佢乜都啱。所以我就瘋狂咁掃咗成車禮物畀佢。香港隊嘅隊員都好感激黎教授，感激到違抗我話「我負責買手信」嘅禁令。隊員 Aaron 堅持要用自己錢送隻特別版「拉麵比卡超」畀教授。
教授收到後，又畀信息我：「Thanks a lot for the massive gifts! I love all of them, especially the Ramen Pikachu!（多謝厚禮！我全部都好鍾意，特別係拉麵比卡超！）」
今年，我無搵黎教授贊助，因為我驚教授覺得我哋係伸手黨，甚至係一班年年走去呃佢錢嘅騙子。而且官方已經贊助咗蝦皮機票同酒店，所以財務壓力細咗好多。因此，我唔想輕易用黎教授呢張「人情牌」。
不過每日嘅比賽戰況，我有同佢匯報。
我：我哋時刻都記得教授舊年支持我哋，等我哋出去吸收經驗，令我哋有今年嘅進步。首日比賽全勝！
教授：Wow! I hope you win!（祝你勝利！）
隨後一路更新戰況，黎教授一路叫我哋加油：有時做鬼臉、有時讚好、有時就 send 個「老鼠仔」嘅 emoji 畀我哋，叫我哋加油。
最後我話：「黎教授，成功了！我們是世界冠軍了！」
佢就派咗好多個心心畀我。
今朝，我發現原來香港電台嘅英文台有訪問黎教授。
佢話上年我哋畀咁大份禮物佢，佢好唔好意思，因為多到玩唔曬。佢話：
“I’m happy. I’m very happy!
「我好開心，非常之咁開心！
I feel extremely proud of them!
我以佢哋為榮！
I’m a bit disappointed they did not ask me to sponsor them this year.”
今年無搵我贊助，我有啲失望。」
原來我一直以小人之心，度君子之腹。我驚黎教授會嫌棄我哋問佢攞錢。點知教授一直想搵個機會還一個佢唔需要還嘅人情畀我哋。
其實過去一年，我去咗兩次旅行，每次都有買比卡超手信畀教授，但都無寄出，因為我驚教授覺得我市儈：買幾百蚊禮物畀佢，然後一到夏天就問佢拎成萬蚊贊助！
我真係以小人之心，度君子之腹！
喺我心目中，個冠軍黎教授係有份嘅。無咗佢舊年嘅栽培，畀我哋出去見識世面，唔會有今日嘅蝦皮。」

文末Sam再向黎教授致謝：「個冠軍黎教授係有份嘅。無咗佢舊年嘅栽培，畀我哋出去見識世面，唔會有今日嘅蝦皮。」網友紛紛留言讚教授有情有義，更笑稱「原來黎教授是個大細路！」

圖片來源：English Lesson for Freedom Facebook , IG@Englishlessonforfreedom

《好有脆》專門發掘社交媒體熱門帖文，所有內容及相片版權均屬發布人擁有。