根據Fabrizio Romano嘅報導，沙特球隊伊蒂哈德(Al Ittihad)同利物浦達成口頭協議，即將簽下利物浦中場球員法賓奴，法賓奴亦已經係今日完成體測，雙方將會簽下三年合約至2026年，轉會費大概為4000萬鎊，利物浦再一奪冠成員離隊，中場陣容大換血🔴
現時29歲嘅法賓奴係2018年加盟利物浦，效力球隊5季拿下社區盾、足總盃、社區盾、歐聯同英超冠軍，過去一季縱使同軒達臣一樣有跌watt，但整體上少傷病、出勤率高同擔任後場唯一純防中嘅佢無形中為球隊不斷貢獻，如今離隊轉戰沙特，相信一眾利迷都會感激佢嘅貢獻👼🏻
利物浦一直為人詬病嘅中場問題，本來係年紀老化，而今個夏天購入麥亞里士打同蘇保斯禮後，中場線人選一度人滿為患，其後隊長軒達臣前往沙特投靠謝拉特，如今利物浦再一中場大將離隊，將會大大提升購入修咸頓防中小將拉維亞(Romeo Lavia)嘅可能性。當然中場線大換血能夠馬上提升活力，但一個無經過長時間夾過嘅中場線，或會令紅軍下季季初嘅表現較為不穩定。
最後伊蒂哈德購入賓斯馬、法賓奴、簡迪同祖達，今日嘅友誼賽賓斯馬先射入世界波，因此沙特聯都真係有啲噱頭🕺
▼Follow 足球港場
Instagram: https://www.instagram.com/footballarena_hk/
留言 0