根據Fabrizio Romano嘅報導，韋斯咸以3400萬鎊從阿積士簽下防中艾臣艾華利斯(Edson Álvarez)，雙方將會簽約5年至2028年，韋斯咸終於達成今個夏天轉會窗第一個收購⚒️
韋斯咸上季贏下歐協聯冠軍，今季需要征戰歐霸盃，而今夏轉會窗只係出售球隊核心迪勤懷斯(Declan Rice)，遲遲未有補強行動，一度令莫耶斯領隊一職危在旦夕🥴事實上，韋斯咸隊中有新任技術總監，而技術總監史迪提(Tim Steidten)同莫耶斯嘅收購方針一直有出入，例如富咸嘅柏連拿、車路士嘅干奴加歷查同修咸頓嘅華特包斯，韋斯咸都只係出一口價，被拒絕就無繼續持續落去。收購目標同價錢上二人都未有達成共識，令韋斯咸嘅補強行動相當援慢。
直到開季前5日，韋斯咸終於達成第一單收購，現年25歲嘅墨西哥國腳艾臣艾華利斯，係2019年加盟阿積士，效力2季一直係球隊主力，角色上主要係墜後控球組織嘅中場球員，有必要時都可以退到中堅位置。速度上雖然較為遜色，但善於攔截同閱讀球賽，因此功用上同離隊嘅迪勤懷斯較為相似🥹
艾臣艾華利斯其實一直係豪門嘅獵物，曼聯、車路士都有一直觀察此球員，車路士上季亦曾作出報價，球員同阿仙奴亦間中扯上關係，而其中多蒙特曾最接近簽下艾華利斯，只不過最後多蒙特將目標轉向尼美查(Felix Nmecha)而令交易告吹。一直希望登陸英超嘅艾華利斯終於夢想成真，但目前韋斯咸嘅收購步伐亦未停止，據報西咸報價6000萬鎊企圖打包麥湯文尼同麥佳亞，能否係開季前再作引援就要睇莫耶斯同技術總監嘅合作🥺
最後，阿積士上季失落聯賽冠軍後，今年繼續毫不保留地賣人，包括艾華利斯、中堅巴斯(Calvin Bassey)、前鋒泰迪(Dusan Tadic)、中堅添巴(Jurrien Timber)同埋即將離隊嘅達拉美(Mohamed Daramy)，如此大手賣人，縱使阿積士係歐洲著名嘅青訓工廠能夠提拔年輕人，但能否保持實力爭奪冠軍就令人擔心🤔
▼Follow 足球港場
Instagram: https://www.instagram.com/footballarena_hk/
留言 0