【Sally出遊】台北夜生活不只落Club　帶你超抵價任打機、碌齡

講起台北夜生活，好多人會想起到夜市飲飲食食，又或落Club玩。不過Sally肚仔細細食得不多，去蒲又不太感興趣，要打發漫長的夜晚真的有點難度。就在躊躇之際，當地朋友仔就帶了Sally到一家室內遊戲中心，說只要買一張票就可以玩盡入面所有設施，聽落似乎幾有趣！

今次去的地方叫做「E7pLAY」，因為設施大人細路都適合玩，價格又非常相宜，一直都很受當地人歡迎。不過講真其門面比較舊式、簡陋，旅客會比較少留意到。它分別有兩間店位於台北三重區及新莊區，另外在高雄苓雅區亦有一間。Sally到訪的是「E7三重店」，捷運台北橋站出來，走大約7分鐘就到，地點算是便利。

進場時大家要先選擇玩3或5小時，因為它們屬於兩種不同票價，而於平日或周末，以及不同時段到訪亦會收取不同價錢。不過不用擔心海鮮價，價格全都列在它們的官網內，去之前可以參考下。Sally之所以話好抵玩，全因最貴的假日下午5小時券都只是NT$310（約HK$80），香港去間Café坐下都不只這價錢喇！不過Sally朋友就提醒，繁忙時間如果店內太多人，有可能要取票後在外慢慢排隊輪候入場，建議行程許可的話，安排在星期一至四晚到訪會較好。