「點解冇出街洗錢仲多過出街㗎？」最近好多人日日喺屋企，正常開支應該會比平時少，但事實反而係洗多咗！唉，咪係因為網購囉，選擇多、方便、容易搵到平嘢呢啲原因就唔多講啦，有冇諗過負面情緒都會令你買多咗嘢呢？近日嘅社會環境的確容易令人有負面嘅情緒，一嚟擔心疫情，二嚟日日屈喺屋企，影響到社交生活，或者係打亂咗定好嘅計劃⋯⋯為咗發泄呢啲唔好嘅情緒，我哋好容易透過網購得嚟嘅愉悅感安慰自己，但係呢種愉悅感往往都好短暫，而負面情緒都冇被真正紓解到，所以我哋就會不斷地買，等自己個心舒服啲。想自己唔好再咁落去其實係有辦法嘅，不如試下以下嘅辦法先啦～
1. 搵出令你網購嘅原因
如果你係因為內心空虛、情緒不佳而網購，咁就要搵其他辦法去令自己開心返，例如令自己生活充實啲，可以睇下書睇下戲（咁當然盡量留喺屋企睇安全啲），執下屋，行下山（記得唔好留低垃圾），研究下食譜煮下飯仔等，都係打發到時間又有益嘅活動嚟㗎。當你嘅專注力被分散，就冇咁易困死喺負面情緒當中，自然會減少咗網購啦～
2. 分清「必要」和「想要」
喺買嘢之前，務必要諗清楚件貨物係你真係需要，定係只係想要。其實我哋喺網購睇中嘅好多嘢都係因為一時被吸引，覺得好靚好得意好平就即刻買咗，如果俾多啲時間自己諗諗，就會發現好多都真係冇乜需要買。例如買衫嘅時候可以先諗下你睇中嘅款式自己有冇類似嘅，如果你衣櫃已經有差唔多嘅款式，咁就冇乜需要再買件相似嘅衫。
3. 睇中唔好即刻買
如果有睇啱嘅嘢，建議先將佢擺喺「購物車」，過一排再睇返你就會發現「點解當初我會鍾意呢樣嘢？」，咁你就會篩走好多你唔係真係咁鍾意嘅嘢㗎喇～
4. 戒用信用卡
小編知道完全戒用信用卡就好難嘅，但可以試下喺非必要使用信用卡嘅情況下用現金付款，例如盡量去實體店買嘢，咁樣仲可以俾多啲時間自己思考係咪真係需要添。如果真係對自己理財能力好冇信心，降低信用卡額度都不失為一個好辦法。
留言 0