林盛斌Bob曾演《少林足球》「士巴拿」　因學業而放棄：同星爺致謝

周星馳(星爺)的《少林足球》絕對是經典，當中「士巴拿」一角亦令人印象深刻。原來除了馮勉恆演出的上映版本外，林盛斌(Bob)都曾演過這個角色！而當年他更只是大學二年級生，最後因為學業而離開劇組。

林盛斌早前在社交平台上載大學時期拍的片段，讀大學二年級的他仍有頭髮，他留言講述當年拍過《少林足球》的經歷：「大學二年班，電影《少林足球》公開招募演員，抱住見識吓嘅心態去試吓，跟住俾我過五關斬六將，最後符符碌碌地竟然被周星馳先生睇中咗，所以我就向學校請咗一個禮拜假，去番禺拍戲，客串做一個角色，就係喺沙地嗰場踢波戲，我做流氓隊嗰個隊長(即係跌咗士巴拿嗰個)但係因為劇組某啲原因，拍過嘅嘢要重新拍過，無奈地我已經要返香港繼續我嘅學業，所以唯有忍痛離開好好玩嘅劇組，而臨走前，我都同星爺致謝同告別。」至於這段影片中，Bob就向拍攝的女同學指提早回來的原因是她：「我知機會好難得，但我未做好心理準備。同埋我唔捨得你哋，尤其是係你，尤其係你。」之後Bob更指拍攝者是他當年暗戀的女同學：「而你睇緊呢條片，就係我返到學校之後，當時呢一位我暗戀緊嘅女同學，佢用部手機影住我，問我點解咁快返嚟，點解唔拍埋佢先走，跟住我就同佢講咗呢啲嘢……然後，佢有一段好長好長嘅時間都避開我。而家睇返當時嗰個衰樣同埋把聲，真係有啲cam。」