前陣子，小編與友人一齊去灣仔新店「鮨婷」食飯慶祝，對於當席師傅Wilson嘅刀功及細心介紹菜式嘅服務態度印象難忘！Omakase除咗料靚、師傅手勢好，服務態度真心都係重要一環！為整餐體驗加分！
此外，講到食材及製作，鮨婷都不惜功本！好似造訪當日，我就食到當造嘅北海道白海膽、毛蟹、宮崎A5和牛、地金目鯛…等，全都是矜貴及稀有嘅食材！製作上，鮨婷又會精心選用大量時令食用花伴碟，好似櫻花（真係有一串，不是一兩粒花！）、南天葉、春菊等，加上日本高級嘅九曲燒陶器，令菜品睇上去更賞心悅目！
成個用餐體驗都較預期好，絕對會再回頭！
\前菜/
✦ 雞肝醬‧螢光魷魚
雞肝醬用咗黑椒調味，上有乾果粒，溝埋一齊食好香口；螢光魷魚串沾醋麵豉醬燒製，微酸更突出海鮮鮮味，內有綿熟嘅魷魚子，口感好soft！
\刺身/
✦ 右口魚‧石垣鯛
右口魚分別卷咗右口魚裙邊及海膽，前者肥美甘香，後者鮮甜香滑；石垣鯛肉質彈牙，簡單點wasabi食已鮮味十足！
✦ 活赤貝‧小長井華漣蠔‧象拔蚌
師傅即席拍打赤貝，赤肉肌肉收縮，口感更爽更新鮮；來自九州長崎嘅小長井華漣蠔，肉質清甜，口感清爽，佐酒一流；象拔蚌海水味重，鮮甜，配上墊底嘅鮮檸檬片，有助提鮮及減低海水味。
✦ 櫻花‧富山灣白蝦‧北海道牡丹蝦
上文提過嘅超高顏值菜式，有一串食用櫻花及金箔伴碟，勁靚！富山灣白蝦加咗柚子皮及岩鹽調味，膠質重，鮮甜十足；北海道牡丹蝦肉質飽滿，上面嘅燒蝦膏好濃好惹味！
✦ 北海道毛蟹‧赤海瞻
生拆北海道毛蟹肉，鮮甜又有咬口，上有赤海膽，好甜好濃郁，伴紫蘇花食，減膩又清新。
✦ 北海道白海膽
踏入春季，又是白海膽季！造訪當日，師傅私人醒咗一份比我哋！好佛心！🤤白海膽即是變了性嘅雄海膽，無咁重海水味，反而有陣蛋黃、蟹膏味，肉身飽滿，真係一試難忘呢！師傅放了幾片在我手背上食，佢話體溫令海膽變暖，咁食個鮮味會更出，食時果真如此，真係好幸福呀！
✦ 沙甸魚磯邊卷
沙甸魚好肥美，見到師傅邊整邊出油，小編表示好high！😍 加咗蔥、胡蘿蔔及wasabi卷埋一齊，入口肥美鮮濃，好正呀！
✦ 拖羅（Kama Toro）
師傳準備咗魚鮫拖羅位比我哋，因為近魚骨位，肉味特別濃！師傅細心喺拖羅上切井紋，令醬汁更充分滲透魚肉，入口即溶，魚油香在味蕾間徐徐滲出，令人回味無窮！
\煮物/
✦ 宮崎A5和牛三文治
呢個煮物好有誠意！用咗高級嘅宮崎A5和牛，以吉列方式厚炸，剛好5成熟，肉質好腍，零血水，加上烤得香脆嘅三文治包，超香口！
\壽司/
✦ 新墨魚
即BB墨魚，非常嫩口，好重膠質！因為已已放兩日熟成，口感帶點黏囉，更正！
✦ 深海池魚
深海池魚簡單加上柚子皮即食，好嫩好爽口。
✦ 醬油漬赤身
赤身咸香嫩滑，伴有芝麻碎及海草，成件事更香口。
✦ 地金目鯛
來自伊豆嘅高油份魚種，經過師傅炙燒，油香更濃更突出。
✦ 鯖魚
採用養殖嘅鮮鯖魚，肉質好滑，好綿，兩片肉中間有一小段芽蔥，更突出油脂香！
✦ 火炙蛇腹拖羅
油香豐富，肉質煙韌，師傅細心切開晒筋，入口又腍又香。
✦ 拖羅蔥油卷
師傅即場燒拖羅，逼出油份，再加入蔥、芝麻、黃蘿蔔、中拖羅、赤身及天掃羅炸碎，整成卷物，成件事好香口好邪惡！真心超好味！😍
✦ 伊達卷‧江戶前玉子燒
師傅話伊達卷係日本新年先食，蛋白好濃；
另一款係江戶前蛋糕，口感好濕潤，無麵粉，純靠企身蛋白整，入面加咗大和芋及魚肉，更黏口及咸香，好好味！
\湯/
✦ 蟹粉麵豉湯
用咗白味噌及赤味噌，兩溝溝嘅蟹粉湯，咸咸鮮鮮，幾暖胃。
\甜品/
✦ 梨片玫瑰‧士多啤梨乾
估唔到連甜品都咁靚！用梨肉卷成玫瑰花，清甜解膩！伴有青蘋果蓉＋士多啤梨乾，甜甜脆脆，不錯呢！
📍店家傳送門：@ting.sushi
With：@frankiechoi828 , @kelvinyfl, @lisa_l_minnie
✾分類標籤
#daydayfoodie_omakase
👆ᴿᵉᵃᵈ ᴹᵒʳᵉ
★－:+:－:+:－:+:－:+:－★
🎡味道：4
🎠環境：3.5
🎪服務：4.5
🕌CP值：3.5
（*5為最高分）
★－:+:－:+:－:+:－:+:－★
鮨婷
◌ 灣仔謝斐道262號杜智臺地下6號舖
★－:+:－:+:－:+:－:+:－★
🎀 記得like埋我，每日放送打卡好去處！📸
留言 0