63歲吳岱融懸崖半天吊親身上陣 慶幸平時有踢波跑步

無綫劇集《隱門》進入結局篇，昨晚（23日）劇情講述葉嘯天（天哥，吳岱融飾）遭Pho哥（杜燕歌飾）手下Tony（陳少邦飾）等追入叢林，天哥吼準時機奮力反擊，三人打到飛起兼碌落地，混亂間天哥碌落懸崖邊半天吊，這場追逐戲險象環生，原來年屆63歲的吳岱融更親身上陣，吊著威也小心翼翼地沿著懸崖邊往下爬，相當搏命。

吳岱融在劇中的懸崖垂吊戲有一定難度，今日播出的拍攝花絮中，同劇的陳展鵬大讚對方專業：「本身個地方已經危險，劇組仲專登拍到個感覺好危險，所以會show晒成個景出嚟。岱融哥好敬業樂業，佢做咗兩、三個take，仲要落到好低好低，依家觀眾睇戲好注重質感，我哋都希望畀到效果觀眾。」

吳岱融笑言為了讓劇情更合理，主動提出將單手改為雙手垂吊，又笑指當初答應演出時，並不知道有如此多打戲：「但都試吓啦，盡力啦，都好嘅，免費健身咯，好彩自己平時都有踢波、跑步。」

拍攝現場環境險要，路面崎嶇又多碎石，陳少邦拍攝追逐戲時一度拗柴，鞋底斷開兩截。為了不影響進度，他敷冰止痛，再以封箱膠紙當繃帶包住受傷位置，然後繼續拍攝。陳少邦說︰「我哋嗰場戲喺天外天拍，當時大概朝早8點，有個叢林位有啲好大嚿石頭，我追岱融哥時踩咗落嚿石度拗柴。嗰時太早，我哋仲未上去山頂拍，距離收工時間仲有6、7個鐘，一定要諗方法拍埋。我唔算拗得好嚴重，劇務搵咗包冰，我再問工作人員借封箱膠紙包好傷口就可以繼續拍。」