請更新您的瀏覽器

您使用的瀏覽器版本較舊,已不再受支援。建議您更新瀏覽器版本,以獲得最佳使用體驗。

娛樂

獨家丨泳兒獲張敬軒主動教導點做星 自認精神分裂容易跳掣

星島日報

更新於 2022年09月26日11:49 • 發布於 2022年09月26日23:00
泳兒大讚張敬軒是個好好的朋友和前輩。
泳兒大讚張敬軒是個好好的朋友和前輩。

泳兒最近推出新歌《18部半》外,還將於10月2日舉行《Breaking Live 2022》演唱會,為這幾年暗黑曲風作總結。今次演唱會似電影一樣以故事形式呈現,泳兒希望畀到大家耳目一新感覺。提到早前做直播被封為「樂壇社工」的張敬軒搞喊,泳兒笑言有被輔導感覺,更感激師兄不時主動提點教她點樣做星。採訪:杜杜 攝影:譚志光 髮型:Zivyeunghair@leonardo3 化妝:木子維納Vena 服裝:AlexanderWang from Harvey Nichols HK 場地:sloth.cafe.hk

新歌叫《18部半》,因泳兒已推出過18張唱片,而內容就講她近年性格變化「我性格上有啲走向精神分裂,我一向畀人感覺好靜,但我唔係咁鍾意靜,可能有啲人覺得我多愁善感,但係我會對好多簡單嘅嘢好雀躍,我好似跳跳哋掣咁,可能每個人都係有呢種分裂喺裏面未爆發出嚟,首歌就係寫呢樣嘢。」

演唱會似睇電影

創作新歌泳兒投入度好高,今次製作演唱會更加全情投入,她強調今次演唱會是觀眾以往未必見過的類型,「以往可能會唱一啲好想泳兒唱嘅代表作,但基於我呢幾年有好多唔同經歷寫咗喺呢啲歌裏面,佢哋全部都可以構成一個故事,喺呢個演唱會裏面演繹出嚟,所以呢個演唱會入場就好似睇一部電影咁,唔會係一般大家入場睇演唱會嘅氣氛或者流程,希望同觀眾可以好同步,同呼同吸咁帶住大家個情緒去走,好似一個旅程。」

為了宣傳演唱會,泳兒早前開直播跟粉絲分享,張敬軒突然現身,送上鼓勵說話時更搞到她爆喊,令軒公被網民封為「樂壇社工」,她不但認同仲笑言覺得當日似打了去輔導熱線,「嗰晚都有呢個感覺呀!哈哈!我好眼淺,佢又提返起我呢幾年經歷咗啲乜,我嗰刻又諗起咁辛苦行到呢步,開到個夢寐以求嘅演唱會,佢又一輪嘴咁講,都有被輔導嘅感覺。」泳兒又讚軒公好細心,私底下都有不時提點她,「佢講過自己要最着緊自己嘅嘢,唔可以太過依賴其他人,呢樣嘢都令到我有反省,尤其啱啱出道時真係好依賴,佢教我要主動啲,唔好咁被動,唔係要質疑人哋,而係點樣去表達自己嘅想法。」

《星島頭條》APP經已推出最新版本,請立即更新,瀏覽更精彩內容:https://bit.ly/3yLrgYZ

0 0
reaction icon 0
reaction icon 0
reaction icon 0
reaction icon 0
reaction icon 0
reaction icon 0