婚姻｜好多人係年青時，都會想像遇上另一半後，可以好幸福咁手挽手步入教堂，不過隨著年紀長大，好多人都會對「婚姻」有唔同嘅睇法。日前就有港男網上發文大呻「結左婚，真係唔想返屋企」，更直言「寧願返工扮OT，喺屋企樓下個公園度，都唔想返屋企」，引起一眾已婚、未婚港男熱話！到底佢哋有幾感同身受？即刻睇睇！
撰文：海月｜圖片來源：LIHKG｜編輯：odin
婚姻｜港男網上呻：結左婚真係唔想返屋企。一眾網民大表感同身受
年青時好多人都會想像，可以同另一半好幸福咁手挽手步入教堂。不過隨著年紀長大，好多人都會對「婚姻」有唔同嘅睇法。日前就有港男網上發文大呻「結左婚，真係唔想返屋企」：
寧願返工扮OT，行慢啲miss左班車，坐喺屋企樓下個公園度，都唔想返屋企，有冇巴打明白？
港男發文一出後，隨即有唔少已婚、未婚港男熱烈回應，估唔到唔少男士都表示認同，更覺得收工回家後更壓抑。有網民表示身邊有唔少男性朋友收工後寧願留喺公司 OT，或者將車泊喺停車場「放鬆」一、兩個小時先回家。
亦有唔少男士表示婚後就算放工返到屋企，都好似「開始打第二份工」，有時唔單止要繼續做家務，更係餐餐食外賣，睇老婆臉色做人。
不過有網民就表示其實唔關「結婚」事，而係對象問題，雖然同老婆可能不時有拗撬，不過如果對方係一位懂得企喺別人角度諗嘢，咁就經已好好多。
更有位網民以「做Project」比喻婚姻，因為結婚後經已唔再係單純講愛定唔愛，而係代表雙方共同建立一種新生活、一個新家庭：
結左婚，就係要完成一個花費人生幾十年既project, 你老婆，就由同你吃喝玩樂既情人，變成呢個project 既group mate, 什至係project manager, 佢會成日審視你關於呢個project 既進度，點樣可以令呢個project 宏大d
又或者係一個free rider 既group mate, 你會有一個呢個project 只有自己一個做既孤寂，或者跌入一個邊個做多邊個做少既爾虞我詐鬥爭入面。
而最後唔少網民都對呢個「做Project」論非常有共鳴，你又點睇呢？
但無論如何，有件事係肯定嘅，就係婚姻未必係男人嘅墳墓，但肯定係愛情嘅墳墓－你自問人生做咁多次 project，有幾多次係可以唔同 group mate 反面？仲會愛上group mate？
留言 4
667942
睇完編文章，我反而覺得有大部份男人都只站在自己立場去批評自己所選的老婆或同居者，他們也沒有站在女方立場去諗，一味只覺自己付出很多而女的只懂享受，其實個女人有冇付出過，他們又是否知道？當然有部份女人又真是懶過隻豬。要知道屋企係大家的，如大家也有出來工作，就應大家都要分擔家務，取個老婆回來不是要佢做工人姐姐，也一樣，嫁個老公係要互相遷就忍讓。
2021年12月20日05:28
Steve
咦！咁結婚時點解又講什麼一生一世，結婚不嬲代表冇自由失自由，乜女都唔溝得，知心女友人都唔可以有，從來唔會羨慕人拖住個老婆，因為單身有的幸福結婚的一樣冇，公平的。
2021年12月20日04:57
B
見到d 男人話樓供哂 家用比哂 老婆都唔煮飯， 其實我都好想要呢d 老公 , 利申 日日煮飯 不過都係公一份婆一份 😂
2021年12月19日17:27
N
作為女人，作為老婆，作為一個媽媽，見到有個男人話，寧願返屋企做返老母個仔，真心覺得呢啲人唔適宜結婚，根本都無長大，仲期待阿媽湊～
我對住5歲嘅仔都要求佢自己做部分家務（執自己碗筷、掃地抹枱），屋企係屬於一家人而唔係一個人，點解家務要由阿媽做晒？？？做人老公都咁諗野，你真係唔好生仔，不論生男生女，你咁教都只會教個廢人出嚟～
女人會唔會煮飯其實係拍拖已經知；呢個真心係興趣嚟！我都好懶，但我會煮飯，因為煮食（我主要煮正餐）係我興趣，拍拖時已經常常煮；唔鍾意煮嘅女人，當然婚後都唔會煮；老婆你自己揀，你唔係接受到佢唔煮飯先娶佢架咩？？？
我朋友生左3個小朋友，佢連即食麵都唔識煮，但對小朋友其他事都好上心，放假一定帶佢哋周圍玩；人哋請夠2個工人姐姐黎照顧小朋友！講真，兩公婆都返工，就好心夾錢請個工人幫手做家務啦！請個鐘點好難咩？錢又想慳，兩公婆又唔想做家務，玩嘢呀？！仲好意思話「返到屋企好似返第二份工」，同老婆扑野果時唔見你話係返工？？都係果句，間屋係一家人有份，大家分工合作做家務好應該！唔肯做就俾錢人做，唔通仲諗住要你哋老豆老母黎照顧你兩個呀？？
2021年12月19日16:20
顯示全部