5大居家運動APP推介 WFH必睇！瑜珈控＋網上連線合作＋明星運動員陪你做運動

運動APP｜第五波疫情爆發，對大家嘅生活影響甚大！很多市民選擇如無必要都不會外出，寧願留喺屋企避疫。但避疫嘅同時，大家都記得要做運動！始終做運動有助新陳代謝，身體更健康。以下為大家推介5款運動手機APP，留喺屋企都可以出身汗！

WFH必睇！5大居家運動APP推介

瑜珈控＋網上連線合作＋明星運動員陪你做運動

1.一家大細岀汗之選 Active Arcade

呢個app主打互動體驗，可以一個人玩、多人玩或網上對打。呢個APP會透過手機嘅前置鏡頭，感應用戶身體，然後用戶跟著指引完成運動。玩嘅時候建議將手機靠櫈或者牆擺，當然玩嘅時候要揀一個空間較闊落嘅地方。App介面清晰，下載完亦無需登記就可以即刻玩，而且仲可以連接去電視，全家人一齊玩，岀身汗，精神哂！

2.明星運動員陪你做運動 Nike Training Club

Nike嘅健身App由推出以嚟已經大受歡迎，使用App之前要填寫基本個人資料同對使用App嘅目標，減肥、增肌或增柔軟度等等。之後會因應使用者嘅需要度身訂造運動計劃。每項訓練都有明星運動員教你做，訓練過程會對你講鼓勵性嘅說話，真係感覺到佢就喺你隔離。

3.結合遊戲與運動之選 Walkr

做運動有好多種，Walkr將計步器加入探險遊戲元素，記者個人覺得某程度上就好似玩緊數碼暴龍機咁，一邊行一邊達成指定嘅健身目標，更隨着運動編寫劇情嘅發展，仲可以收集星球。另外，可以叫埋朋友一齊組隊玩，領豐富獎勵去救外星人。即使疫情不能外出，大家喺屋企來回散步時，呢個APP應該可以幫忙增加散步趣味。

4.懶人之選Seven:Home Workout Training

呢個App專為疫情而設，全部都係在家適合嘅高間歇運動。唔好睇小嗰7分鐘，如果你跟足App嘅指引，呢7分鐘係等同於做咗一個鐘嘅gym，仲要係地獄式嗰隻！當然APP嘅運動有唔同程度選擇，大家可以揀一個適合自己嘅程度嚟做運動，切忌操之過急咁就弄巧反拙。

5.瑜伽愛好者之選 Daily Yoga

瑜珈一直都係唔少港人鍾意嘅運動之一，雖然網上都有好多教學，但呢個App可以連繫各種運動手錶，可以全面性咁記錄低你運動時嘅心跳、燃燒咗幾多卡路里。同樣使用App之前要填寫自己嘅體質同目標，因應你嘅要求提供適當嘅瑜伽課程畀你練習。練習時間由5分鐘到45分鐘，講解清晰之餘，仲可以令用戶減低受傷機會。