口罩2盒thx／你屋企夠唔夠？香港人瘋搶十大日用品

香港人，自救！

如果有經歷過2003年沙士爆發，2020年嘅香港，悲慘情況仲要比起之前更加可怕。香港，到底會唔會變成疫埠？香港，再咁樣落去，會唔會有社區爆發？肺炎病毒咁勁，做為一個小市民唯有盡力自保，採購物資等自己唔好中招。喺呢種心態之下，香港各種同抗疫有關無關嘅日常用品，都一一俾香港人搶購一空。今時今日，做香港人除咗自救，真係無咩人可以幫到自己。到底有幾灰？今日就等DailyView用網路大數據話你知，十大缺貨嘅日常用品係邊幾種喇！

DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。

NO.10 空氣清新機（215筆）

空氣清新機，到底係咪真係對防疫有效？有專家話，其實空氣清新機放喺屋企看門口，係真係有效嘅。空氣清新機，除咗淨化環境有呢個效用，其實都可以有效過濾咗帶有細菌病毒嘅飛沫，同埋有機微生物，咁樣自然有防疫功效。空氣清新機平時對空氣流通都有用，無論咩病都好，唔患就最安全。今時今日，邊有人仲敢去睇病呀！

網民：「雖然一部都幾貴，但為咗安全都要買返部！」

image source:FB/SHARP HK • 用心生活

NO.9 濕紙巾（468筆）

出街、看門口，最方便唔係咩藥水、酒精，皆因濕紙巾先係最方便有用。隨時隨地，濕紙巾都可以用嚟抹嘢，又可以洗手，食嘢前後一張就有晒效。但係，濕紙巾都要睇返成份，如果只係單純濕紙巾，無酒精消毒效果，就千其唔好用喇。香港人要買嘅，一定要注明具消毒效果，咁先可以有效殺死病毒。而家，呢種濕紙巾已經相當珍貴。

網民：「屋企堆濕紙巾貴重過黃金，唔可以亂用。」

image source:FB/莎拉韓情 사라한정

NO.8 消毒藥水（489筆）

消毒藥水、消毒酒精、消毒咩咩咩⋯⋯到底有咩分別？消毒藥水同其他唔同嘅，就係佢主要係用嚟消毒地板、衣物、洗手間同玩具咁，仲可以用嚟對傷口用，消毒傷口唔會再進一步惡化。不過早前外國瘋傳滴露可消滅冠狀病毒，令到好多人都搶購一空。而家已經有醫生話，消毒藥水對冠狀病毒無特別大嘅作用，睇嚟大家可以唔買咁多。

網民：「總之見到有消毒都買咗先，實無死。」

image source:FB/Pricerite

NO.7 消毒酒精（651筆）

消毒酒精有幾work？萬用！洗手得，家居清潔得，真係消毒萬用佳品。不過，消毒酒精都有分75％同95％，兩者相差20％，但消毒效果就好唔同。台灣網路紅人理科太太講，95％太高濃度，反而唔啱用嚟消毒，但可以用清水嚟溝3：1，就有返75％嘅消毒效果。大家如果買唔到75％，其實都可以買 95％溝淡，咁就又有得消毒喇！

網民：「而家隨時都有致命病毒，消毒酒精真心有用。」

image source:FB/輪胎城重型機車新莊店 Motor Rental Town

NO.6 洗手液（913筆）

洗手液，雖然無搓手液乾洗手咁方便，但用係屋企平時出入洗手，就好啱用喇。佢嘅份量、價錢都比搓手液CP值高，難怪大家都去搶購，今時今日，已經買少見少，俾香港人全部都搶購一空。其實無論有冇病毒，多洗手，洗足三十秒，就一定係好事。董太當年都有講：「千祈千祈千祈、洗手洗手洗手」。大家而家都緊記呢句話呀！

網民：「我都想買洗手液，有邊個知邊到仲有？」

image source:FB/彩豐行 Choi Fung Hong

NO.5 漂白水（1015筆）

家居消毒最有用，就緊係漂白水喇！漂白水可以1:99稀釋家用漂白水（以10毫升漂白水混和於1公升清水內），可用於一般家居清潔；1:49稀釋家用漂白水（以10毫升漂白水混和於0.5公升清水內），可用於消毒染有嘔吐物、排泄物、分泌物或血液嘅表面或物件。漂白水咁好用，香港人緊係狂買，自己屋企消毒做得好，至少可以好好咁休息。

網民：「屋企平時都有用開漂白水，唔係都唔知點買。」

image source:FB/Marigold Hong Kong 菊花牌手套

NO.4 搓手液（2462筆）

肺炎可以透過飛抹傳播，咁飛抹呢，係可以粘喺物件嘅。我哋就算有口罩，喺出面食飯，可能會經由隻手就接觸整到眼或者口，都有機會中招。咁可以係街外邊隨時隨地幫自己隻手消毒，就相當重要喇！搓手液可以乾洗手，又細細支咁，真係好方便，而且醫生都話有效。唔怪得全香港人個個都想有一支，真係消毒消得好，生命可到老。

網民：「真係好有用，始終好多人都要出街食飯，消毒防身保命。」

image source:FB/Yahoo 購物

NO.3 廁紙（2886筆）

香港奇聞，就係前排香港人搶購廁紙喇！話說呢單嘢，係嚟自Whatsapp群組流傳一段神秘但聽落好有公信力嘅錄音，話香港廁紙嘅供應商即將停工。但事實係，網民Fact check發現供應廁紙嘅生產商嚟自台灣，佢哋都無講過會停止供應。不過好多香港人都信以為真，一於買定先實無死，結果好多好多人都要搶。不過唔緊要，廁紙實會返貨。

網民：「香港人真係好悲哀，估唔到連廁紙都搶，醒少少！」

image source:FB/流氓小編

NO.2 柴米油鹽（3070筆）

柴米油鹽，係衣食住行之中最重要嘅一樣嘢，無咗嘢食好多人都無方法係屋企生存落去！呢個正正係點解咁多人搶購柴米油鹽嘅原因。如果香港人總有一日會無晒口罩可以用，咁最安全嘅方法，當然係足不出戶，自閉係屋企喇。雖然呢個方法唔係長久之計，但總好過咩都無。所以當我哋見到有去買成堆柴米油鹽，唔好笑佢哋，有原因嘅。

網民：「柴米油鹽都無晒，幾時先會返貨，等我即刻去買。」

image source:FB/热点 Hotspot

NO.1 口罩（102890筆）

香港網路上而家出現咗好多同口罩相關嘅專業用詞，好似有冇PFE、VFE、BFE等等，其中有一個好笑嘅，就係2盒唔該。點解咁好笑？因為只要網路上有人話有多嘅口罩，又或者有好心人話有秘密方法可以幫手訂購，即刻就會有堆留言話要幾盒。香港人排生排死咁辛苦，食埋炒價都買唔到口罩，見住屋企存貨就嚟無晒，唯有見咩都話要咗先喇。

網民：「真心灰，一家四口得返十幾個，成家都好絕望！」

image source:FB/怪叔叔の散步道

【香港網路溫度計調查結果之圖文，未經授權請勿轉載、改寫】

分析說明：

本研究資料由《KEYPO大數據關鍵引擎》提供，分析時間範圍為2020年01月10日至2020年02月08日。

網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『十大香港買不到的用品』相關文本進行分析，並根據網友就該議題之討論，作為本分析依據。

本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。