手機不離手已經成為大家嘅日常，但有時都會唔小心整跌部電話，或者食食下飯倒瀉水，搞到部手機濕晒！手機入水後，大家最關心一定係開唔開到機，坊間有唔少手機入水解決嘅方法，最多人用嘅相信係拎風筒去吹部手機，究竟邊個方法有用，係唔係真係成功救機？一齊睇下手機入水邊個方法最有用啦！
圖片來源：網絡圖片｜撰文：Sharon
手機入水後，最怕就係會開唔到機，以下嘅方法就可以幫到大家啦！
1. 整乾手機表面
喺水入面拎出手機後，千祈唔好第一時間開機，而係要令手機盡快遠離潮濕環境，以免水分滲入手機更多。仲要記得將SIM 卡、SD卡等拆除並關機！除咗可以避免水份留喺手機嘅裂縫，仲可以減低零件受到損壞。
2. 貓砂
有人會問過「手機入水，放落米缸Work唔Work？」雖然呢個方法可行，但成效並唔大，大米嘅吸濕能力較弱，所以建議大家可以試下用「貓砂」～首先將手機自然曬乾3天，再放進貓砂，至少需要放置24小時，先可以吸乾手機入面嘅水分，用貓砂係因為吸水能力相比大米更佳，加上價錢都相對便宜！
3. 抽濕機
一講到手機入水，唔少人第一時間一定係話用風筒吹下手機，但原來用風筒嘅熱風嚟吹乾手機，其熱力可能會損壞手機內部零件，呢個方法係大錯特錯！風筒雖然能夠快速吹乾手機，但反而可能令水分擴散，令手機其他零件都入埋水。所以可以改用抽濕機，比較安全，記得都要關機再用紙巾抹乾機身表面先啊！
4. 密封膠盒
唔係每個人屋企都會有抽濕機，大家可以用具吸濕能力嘅產品，例如強力除濕劑等去代替，再將手機放入一個密封膠盒。
如果以上嘅方法都唔work，咁就可能要交畀專人去維修喇！
留言 0