譚輝智求證狄波拉成忠粉原因　「鍾意你生到咁嘅樣都夠膽上台囉」

譚輝智憑無綫歌唱節目《中年好聲音2》爆紅，由素人變成人氣王，不止舉辦個人演唱會，商演亦接不停，他近日接受電台訪問，自揭唱歌深受爸爸譚握籌影響：「我細個讀書，佢朝朝七點就開機唱青山的《可愛的人生》。」更透露當初參賽全因家人在背後夾計，安排他跟第一季參賽者李佳學唱歌，後來對方代他報名，他直至收到面試電話才發現。

譚輝智自認怕醜，往電視台面試當日，想過打退堂鼓：「一見到個舞台已驚。諗諗吓，綵排都驚到腳軟，正式比賽有評判咪仲驚？當下我直頭想走人。其實我到電視台門口已想縮沙！諗返成件事係開心嘅，成個過程最大嘅得益係自己勇敢咗，行咗一大步，爸爸都為我驕傲。」

譚輝智在《中年好聲音2》中愈唱愈勇，順利入選最後三強，最終在決賽輸給古淖文屈居亞軍，對於被指「揀錯歌」，不應選唱MC張天賦的《記憶棉》，譚輝智坦言無悔：「輸畀古淖文甘心，亦好正常！我無後悔㗎，成件事我承認係有啲任性，因為《中年好聲音2》過往畀人印象唱都係唱舊歌，所以我就想唱下新歌，當下感覺係想唱自己鍾意的歌。」對於整個節目令他吸引到狄波拉青睞，成為他的星級粉絲，原來譚輝智也直接求證過拉姑，「我問拉姑真定假呀？你個仔咁出色，點解會鍾意我？拉姑話：『就係鍾意你囉！唔係因為你唱歌，只係鍾意你生到咁嘅樣都夠膽上台囉！』哈！」

談到家庭，譚輝智自爆與愛妻相識10年，對於愛妻最初吸引他的原因，他表示：「佢似大姐姐最正，好識照顧人！老婆好支持我比賽，而家又係歌迷會主席，處理一切大小事務，真係唔話得！」至於被問及老婆會否擔心他加入複雜的娛樂圈後，會像中二生鄭梓浩般惹來狂峰浪蝶，譚輝智笑說：「太太睇到我咁嘅樣，都應該唔會有狂蜂浪蝶，我諗佢都好放心！哈哈！狂蜂浪蝶，從來無響我身上發生過。」譚輝智更指《多麼感激》這首歌，除了感激粉絲外，就是要送給太太。