有少女原沉迷美容美髮致債台高築，但獲筆者「點醒」後，數年間由揮霍女變成「慳妹」，雖然月搵2.1萬元，但每個月只花8000元，成功儲錢還清舊債後還有餘款可作投資。但她打算數年後去「抽」澳門的經屋（類似香港的居屋），需要儲首期，遂猶豫未來數年應該是每月只做儲蓄及定期存款，還是應該買股博升值。
她指一直認同股票應長線投資，但坦言因遭到炒股賺錢的同事嘲弄而覺得不開心。投資書籍作者兼股評人龔成認為，純儲蓄回報率會跑輸股票投資，加上數年後能否買到樓仍屬未知數，故他建議女事主繼續投資平穩增長股，並同時押注於港股及美股以平衡風險。他又認同女事主「拒短炒」態度正確，因短炒輸多贏少，故建議她毋須理會炒股同事的意見。
【Q36461：少女成功變「慳妹」想數年後買資助房屋，應該純儲蓄還是買股票博增值？】
龔成老師：
我龔sir，你好呀！
距離第一次問你嘢，已經係幾年前，時間真係過得好快，依家我已經在消費上和儲蓄上有了180度的轉變，總叫減少左大部分的超前消費，唔再買美容美髮護理plan。
由欠下很多卡數，可以話係處於負債階段，到現都有儲到少少錢，而且由原本月光族，變到依家d同事都覺得我係「慳妹」。
上年亦有上過你的澳門初級班，對股票投資有左一定認識，但又唔係好熟咁，所以依家都係以ETF為初試類型，之前一直持有隻基金，見個價升左25％，早幾個月就賣了，最近就將啲錢放入股票度。
現時已經32歲，每月收入21,000，固定支出：8,000 (可自由支配收入：約13,000)
現金：110,000
儲蓄保險：117,000 (不用供，現每年計息累積)
股票：
2800, 3000@16.75
3110, 1500@20.19
1810, 400@16.28
因為預計有可能3-4年後會可能有機會購買「經屋（澳門的資助房屋，類似香港的居屋）」，要睇抽唔抽到😔 ，到時需要首期約20萬。
依家感覺好似去咗個瓶頸咁，我應該係增加現金儲蓄量，到時可以即刻有現金支付；還是繼續固定投入穩定的股票，然後到時再賣？ 但又怕到時個價唔啱。雖然依家已經應付到，但又唔想一筆過清袋，所以想在不動用現在的資金，重新儲過一筆20萬，最好能儲到30萬。因為經屋首期個價唔高，都不難達到目標，但就是好糾結應該儲現金，還是每月放股票等佢增值/收股息3-4年？
同埋有時見到身邊同事炒股，經常聽到佢地講今次又賺萬幾蚊啦，呢次又賺幾萬啦，都會覺得好羨慕，但我知炒股不適合我😂 。但佢地就會話我投資就係要夠膽博，你去上堂學咗啲乜？聽到咁嘅說話，真係有啲嬲😂😂 。我希望我可以堅持到初心，以正確心態去投資，唔受佢影響。😂 因為佢地真係靠運氣去賭，可以完全唔認識隻股，見抖音狂講就去買。雖然無可否認有啲人就係一直有點運氣，真係做到短炒可以不停賺，但我相信，不會是我。
讀者敬上
Photo from BusinessFocus
龔成老師分析：
首先，睇到你有咁大轉變，我都好開心。睇得出你呢幾年，真係為咗自己，付出左好多嘅努力。
按你現時的狀況，在3-4年後，你都唔一定會出現置業嘅機會(加上你年青)，所以我唔建議投資過於保守。
考慮到你投資經驗未到好高，同埋3-4年後都有一筆潛在較大的支出，建議你先集中平穩增長股，去作為投資和月供目標。因為3-4年，雖然未算好長，但都足夠做一個簡單嘅增值。
至於你怕到時價格波動，而個係我地預計唔倒，最理想嘅做法，就係你要用筆錢架半年前，慢慢分注去沽貨，去平衡價格波動風險。
另外，我不嬲都唔建議人炒股。我唔係話，短炒一定賺唔倒錢，但你睇全世界最成功的投資人（股神）巴菲特，都只會做長線投資，唔會短炒。而我以往做金融的時候，見到輸錢架都係短炒個班，所以經驗話比我知，短炒係唔理想。
而且，你要明白中短期股價，可以因為好多因素影響，有些因素甚至跟企業無關，所以冇得計。但長線企業價值，必然會反映在股價上。
我地投資唔係單睇贏可以賺幾多，而係要諗點樣喺合理風險下，爭取最大回報，即係要平衡埋個勝算問題。所以，長線投資會係最理想嘅做法。
你唔需要理身邊架人點做，或者諗住同佢地爭辯，咁係無必要。因為你要明白，好多時我地嘅行動，唔係為左同人交代，而係要同自己嘅人生交代。再加上，每個人想法、經驗、風險承受力都不同。你只要用一套你最有信心，最有勝算的模式，咁就可以。
最後，你現時投資架股票，都適合你中長線持有。以下是一些優質的平穩增長股和潛力股，都適合你年紀(月供或分注用)。同埋，長線要加少少美股，去平衡，避免過度集中單一地區。
平穩增長股︰係你長線組合核心，同埋你置業部份的資金，都只宜用佢來增值。
潛力股︰到你更有經驗，開始更認識股票，才慢慢加入。但不要作為主力，只是用來提高長線組合增長潛力而已。
平穩增值股︰指數基金美股追蹤標普500指數的（VOO）、追蹤富時全球股市指數（VT）、追蹤港股的盈富（2800）。
另外再加其他個股：美股如巴郡（BRK.B）、蘋果公司（AAPL）、迪士尼（DIS）、Costco好市多（COST）、麥當勞（MCD）、可樂（KO）、港股如中銀（2388）、港鐵（0066）、港交所（0388）、長建（1038）等，你可以了解下，並從中選股。
如果想增長力高少少，可考慮潛力股，例如指數基金，美股可投資納指基金（QQQ），或在港上市追納指基金（2834）、港股則可考慮安碩恒生科技（3067）、中國電車基金（2845）。另外再加：美股如微軟（MSFT）、Visa（V）、ASML Holding（ASML）、Tesla（TSLA）、Amazon（AMZN）、港股如騰訊（0700）、比亞迪（1211）、小米（1810）等。
==================================
龔成老師簡介
‧ 暢銷書《股票勝經》、《選股勝經》、《年報勝經》、《50優質潛力股》、《50穩健收息股》、《50值博倍升股》、《大富翁致富藍圖》、《80後百萬富翁》、《80後2百萬富翁》、《80後3百萬富翁》、《財務自由行》作者
‧ 理財真人Show 節目擔任致富教練
‧ 曾接受港澳多個傳媒訪問
‧ 過往於銀行從事投資相關工作多年
‧ 曾在萬多元月薪狀態下，憑股票累積數百萬財富
‧ 現為全職投資者，擁過千萬財富
‧ 於網上分享投資心得，瀏覽量過百萬，為人氣博客，解答網友理財問題逾20,000條
‧ 專欄作家
‧ 擁財務學學士學位
‧ 股票課程導師，香港及澳門學生人數逾4,000人
‧ 過往10年投資成績，過半能獲利超過1倍以上
Facebook 專頁「龔成」粉絲人數超過200,000人
（https://www.facebook.com/80shing）
==================================
Text by BusinessFocus Editorial
免責聲明：本網頁一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本公司無涉。投資涉及風險，證券價格可升可跌。
留言 1
Ason
係香港置業同買股都只會變負資產
05月11日16:00
顯示全部