只差一點點，即可再會面
問世間情是何物？直教生死相許！也許相愛很難，但其實雙方各有各寄望怎麼辦？愛情，千百年來人類共同面對嘅永恆問題：到底我哋點先可以出到Pool？真係街裡愛人一對對，睇見都眼冤！有咩慘得過，當身邊嘅朋友一個一個都有伴侶，得返自己無人要，平日都係可以宅係屋企無嘢做？或者仲會俾人哋笑自己係毒男剩女，好似成個社會都睇唔起單身人士咁！搞到單身人士，個個人心惶惶，爭住去物色對象，但單身咁耐又無從入手。今日就等DailyView細數十大最佳出Pool勝地，等大家都知去邊到溝仔溝女喇！
DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。
10 交通工具（133筆）
——十面埋伏
黃偉文〈十面埋伏〉，寫出咗香港人喺都市交通嘅忙碌之間，對愛情嘅永恆追求。「遲兩秒／搭上地下鐵／能與你碰上麼？／如提前／十步入電梯／誰又被錯過？」香港人，有幾多愛情故事喺交通工具入面發生？可能喺我哋日日返工返學、放工放學都要坐嘅巴士、火車同埋地鐵，又見返相同嘅人，可能一早已經一見鍾情，又可能係因為日日見面而日久生情。如果我哋鼓起勇氣講一聲，你好，早晨，又見到你喇！或者喺一個下雨天，你有遮，但佢無，呢個可能就係一段愛情嘅起始。
image source:
9 義工場所（137筆）
——好心好報
如果你單身，又冇做過義工嘅話，就不妨去做吓善事喇！皆因根據好多出Pool嘅網民講，佢哋都係做義工果陣識到男女朋友。拍拖最緊要係咩？NONONO，並唔係外表，最緊要都係性格好，大家相處舒服，先係最開心嘅。咁做得義工，為咗人地付出時間、血汗，心地咁好，已經符合咗伴侶最關鍵嘅條件喇！你又諗諗，如果你做埋佢哋其中一分子，唔單止可以改善自己，做個好人，又可以識到其他心地好嘅異性，真係一箭雙雕！咁著數嘅事，單身嘅朋友記得得閒去做吓義工喇！
image source:
8 婚禮（184筆）
——見證愛情幸福
講到要識異性出Pool，好多人都會忽略咗一個地方，就係婚禮喇！你可能會講，人哋結婚咁放閃咁幸福，我去參加咪得個恨字，又點會對我有幫助呢？老老實實，你咁諗就真係大錯特錯喇！首先，天下間幸福嘅出雙入對嘅，並唔係大多數，好多參加婚禮嘅朋友都係單身嘅。而當佢哋見到婚禮新郞新娘咁鬼開心，自己當然都會好恨有呢種咁幸福嘅未來喇！喺呢個咁令人心動嘅時刻，溝仔溝女真係特別容易。喺婚禮識到異性朋友，好可能大家心目中都期待，下一個婚禮自己就係幸福嘅主角。
image source:
7 教會（189筆）
——有共同信仰
由小學到大學，成日都聽到一個講法，就係要出Pool嘅話，最好嘅地方都係去教會喇！吓，但係我個人係無宗教信仰喎，點去得？其實，好多教會都唔係要你已經信咗教先去得嘅，因為教會係畀個地方，等你有機會接觸信仰，所以照去係無妨。返得教會嘅，多數人都心地好好，與人為善，仲會樂意同你溝通。好多返教會嘅朋友，唔少都係單身人士，去得多，溝仔溝女機會自然都多喇。話唔定，你到時都會信埋教，有埋共同精神信仰，同教會嘅異性朋友多嘢講，做伴侶自然水到渠成，得咗！
image source:
6 酒吧（357筆）
——派對動物
酒吧，一個燈火昏暗，播送令人意亂情迷嘅音樂，加埋酒精，自然成個人都好Chill喇！去得酒吧，打算都係為咗輕鬆吓，飲返杯酒，個人都會比平時更樂意同陌生人傾計。所以好多人都話，要溝仔溝女，落吓酒吧玩，實無錯嘅。落到去，其實大家都心照係為咗識異性朋友，只要你識講返幾句笑話，份人大大方方，主動走埋去同對方傾吓計，女嘅讚吓對方，男嘅請對方飲杯嘢。如無意外，你嘅愛情故事就要喺酒吧開始！細細個阿媽話酒能亂性，唔好飲咁多，但大個咗，就知道飲酒都未必係件壞事。
image source:
5 Speed Dating（432筆）
——快、狠、準
Speed Dating，中文名叫做「快速約會」，目的係為咗鼓勵單身男女喺短時間內同大量嘅陌生人見面，以量取勝，最終快速咁搵到最啱自己嘅戀愛對象。如果你有睇過《欲望都市》（Sex and the City），對呢種新興嘅約會方式，相信都唔會陌生。而家香港都有唔同嘅組織搞Speed Dating，相當受歡迎，周不時都會有傳媒訪問。喺餐廳入面，每一對男女有短暫嘅時間，令對方留低印象，不斷咁重複，到最後再留低聯絡方法畀意中人。咁快速、有效嘅約會，絕啱哂忙碌嘅香港人，絕不浪費時間！
image source:
4 相睇（600筆）
——親友介紹
相對Speed Dating嘅大量、快速咁見好多陌生人，相睇呢種方法就傳統得多喇！相睇，講嘅係男女雙方由親友或媒人介紹，互相見面交流，目的係希望確立戀愛同婚姻關係嘅一種形式。到咗適婚年齡，好多父母都好驚自己仔女搵唔到合適嘅另一半，於是希望介紹自己認識嘅後生男女，畀自己仔女，好多後生仔女都覺得咁樣好老土，其實諗深層，都係等於識朋友嘅朋友咁，無咩奇怪。而且父母介紹得，至少都過咗佢哋果關，認為門當戶對係高質嘅，實際上呢種方式，都真係令好多人走上幸福之路喎。
image source:
3 興趣班（609筆）
——一齊開心
搵情人點樣先可以長久？緊係要有共同興趣喇！如果無共同興趣，日日都係行街、睇電影，好快就會悶到無嘢做。到時先開始搵共同興趣，就真係再慢。所以好多人都會諗，咁不如先從有共同興趣嘅人著手，咁段關係咁一定會長長久久囉！鍾意運動嘅，咪去參加運動嘅興趣班，好似健身呀單車呀。想靜態少少，又可以捉吓棋，飲吓茶咁。興趣班咁多異性，一齊合作，一齊做同一件事，自然大把機會溝通。就算識唔到男女朋友，多樣興趣都係好事，之後溝仔溝女都多個話題喇！咁正，仲唔去報名？
image source:
2 網路世界（1614筆）
——柏拉圖式戀愛
人世間最遙遠嘅距離，唔係你喺我身邊，而係你喺我附近但對我視而不見。愛情，最重要並唔係肉體面對面嘅接觸，心靈上嘅精神交流，先係最關鍵。現代人談戀愛，好多時都只係止於肉慾，所謂精神戀愛，好似已經唔存在喇。不過，其實現代網路世界嘅網戀，就相當柏拉圖喇。大家可能分隔兩地，根本未見過面，但因為網路世界精神上嘅相遇，兩個人戀愛拍拖。呢種網路世界嘅愛情故仔，唔少都甚至走到大家見面、結婚，最後白頭到老。只要有心，而家打開你部手機上網，隨時都可以出Pool。
image source:
1 學校（2533筆）
——人生必經階段
其實，講到人生最佳出Pool嘅地方，咪正正係大家都一定去過嘅學校囉！中學生應否談戀愛？好多網民都話，緊係應該喇！因為喺學校談戀愛，先係真正最不計名利，最單純無邪嘅愛情關係。大學呢個最後階段，都大把人爭住出Pool，亦都造就咗無數情侶。如果你已經大學畢業，又未成功出Pool，都不妨試吓返去讀個Master，多次機會喺校園結識異性朋友。唔怪得有人會話，錢我就大把，我要初戀呀！初戀最多嘅勝地，就緊係校園生活喇，所以咪咁多網民講出Pool地方係學校做第一名，真係實至名歸！
image source:
分析說明：
本研究資料由《KEYPO大數據關鍵引擎》提供，分析時間範圍為2018年11月09日至2019年11月08日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『網民熱議十大交友勝地』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。
留言 0