巴黎奧運｜劍手蔡俊彥主動回覆網民批評　大師兄張小倫爆粗呼籲積口福

巴黎奧運如火如荼，各大電視台招兵買馬找來不少教練、現役或前運動員組成評述陣容，但部分主持被網民批評，其中劍擊方面最為人談論，蔡俊彥被網民點名批評毀譽參半，他亦主動回應批評，而剛退役的男子花劍「大師兄」張小倫今日（28日）亦有在社交平台爆粗，表示希望大家尊重運動員及在電視台做旁述的運動員。

江旻憓勇奪奧運金牌，劍擊比賽由昨日起至深夜不斷舉行，其中有份在ViuTV評述劍擊的現役選手蔡俊彥（Ryan），被網民在Threads批評：「睇ViuTV奧運，聽蔡俊彥講嘢真係好辛苦，鬼食泥咁，又唔做好準備，講到『甩甩咳咳』，有時又發緊夢咁。」

被網民批評持功力有待改進，蔡俊彥亦大方回覆網民批評：「真係唔好意思！第一次做，仍努力學習中，請多多包容，比多次機會啦bro」。該網民亦回覆Ryan：「我呢個感覺係好開頭，不過去到4強同Final嗰陣，我覺得係好咗嘅，同埋有啲搞笑，希望繼續努力加油。」

另一邊廂，「大師兄」張小倫有份為HOY TV擔任主持，今日就在社交平台爆Seed兼爆粗，希望大家尊重運動員及在電視台做旁述的運動員。他寫道：「做香港運動員就係咁，一有成績就係到呱呱嘈，冇成績就係到X，咁細個地方岀到奧運冠軍級別運動員，你估容易丫！要犧牲幾多代人嘅努力同付出，犧牲幾多位運動付出嘅年輕人，你又識得幾多個？？？」

張小倫續道：「唔該大家評論運動員去唔同電影（視）台做旁述嘅時候，積下啲口福，個個捱更抵夜去講專業運動知識俾你哋聽，雖然我哋唔係專業，但係我哋係流住運動員嘅血，係一世㗎，希望分享多啲運動員嘅經歷，有得去參與奧運嘅運動員，我哋當然要幫佢哋打氣，冇得去嘅一樣喺唔同崗位默默努力，不論輸贏係咪都要尊重啲運動員，佢哋用人生最青春嘅時光﹑用努力意志去克服唔同嘅比賽同傷患，希望可以有一日踏上頒獎台，證明自己。」

張小倫又直指，今屆未能參加奧運的運動員，亦需要很大勇氣才走岀來擔任運動旁述。「仲要比大家批評，我性格就係咁有個句講個句，唔鍾意我哋嘅好似睇電視一樣，撳個掣轉台或者熄機。講完今晚繼續OT，香港運動員無論你哋輸贏，永遠係我心中都係世一。」