十大中文金曲︱雲浩影抱恙上陣　張天穎爆男友ANSONBEAN近況

《第46屆十大中文金曲音樂頒獎禮》今晩假紅館舉行，雲浩影憑《慢性分手》獲第6首「十大中文金曲」獎，主持問候身體抱恙的她，她表示「OK」，亦獲「十優歌手」獎，蜜運中的她表示：「多謝廣東歌，會繼續作多啲歌，因為音樂就係我嘅價值。（你啲歌應好Sweet？）乜都有啲啦。」

至於周殷廷（YT）憑《三生有幸》得第7首「十大中文金曲」獎」，他說：「唔好叫我YT，呢首歌嘅MV同Fans有份群演，同Fans一齊攞獎。（第一次攞金曲獎有咩感受？）感覺好神奇。」

Beanies獲「最佳樂隊/組合獎」銅獎，成員張天穎被問到因病暫退出娛樂圈的男友陳毅燊（ANSONBEAN）近況？她表示：「OK啦，佢休息緊，希望大家畀多啲空間佢，佢休息好，準備好心態後，會再重新出發。（佢係咩病？）我又唔係醫生，不過我會陪住佢，可能佢有啲壓力囉。（有冇睇醫生？）呢啲私人嘢佢未入想講，畀啲小小空間佢，同佢溜冰散心囉，同埋佢同朋友去美國旅行兩、三個星期。（男友會休息幾耐？）唔好畀期限佢，當佢攰到一個點，之後就會有番力量就可以重新出發，休息夠再出番嚟。（結婚沖喜？）會唔會仲大壓力呀，依然就係盡情玩先。」

東網網站 : https://on.cc/東網Facebook專頁 : https://www.facebook.com/onccnews/