潛水怕屈機？你咪咁outdate啦！上年度香港十大潮語同你逐個睇！

潮流依家嘢！你識條鐵咩！

潮語，真係跟慢少少都聽唔明隔離人講緊咩！當年「見鬼勿o咀，潛水怕屈機」嘅金句，係HKCEE嘅產物，相信依家好多青少年都未聽過。咁又唔好怪佢哋嘅，HKCEE本身就係時代嘅眼淚啦！不過講起又真係好可惜，以前潮語好本土，好有香港味，近年就……衰嘢唔好講咁多！等堅持打廣東話，打繁體字嘅DailyView網路溫度計，用網路大數據嘅調查統計今年度香港十大潮語俾你睇！

DV小教室：香港網路大數據觀測咗近萬個網站頻道(而且不斷增加ing)，包括港澳地區的新聞頻道、FB、IG同埋各大討論區、Blog……透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析。

image source:Youtube/ELLE MEN

10 侵侵

美國總統Donald Trump，大多數香港人叫佢「侵侵」，合理過「特朗普」好多啦吓話！好心譯名就本土D，啱音D啦，咪搞埋晒小動作！不過講返正題，侵侵成為今年度十大潮語真係好令人驚喜！數據唔會呃人！香港好多人係關心世界時事多過中國娛樂節目嘅！

image source:Youtube/NBC4

9 佛系

「佛系」喺今年好hit，意思係睇淡一切、無欲為求嘅態度，十足出家人咁！「佛系」可以話係一個百搭嘅形容詞，「佛系讀u」、「佛系賺錢」、「佛系扮工」……兩岸三地都好多人用！不過唔講唔知！「佛系」嘅來源據說係嚟自日本，喺2014年3月，日本女性雜誌《non-no》提出「佛系男」（日文：仏男子）嘅概念！

image source:佛系 O O 生成器

8 毛孩

根據大數據顯示，「毛孩」喺今年香港好多人講，但話說《100毛》同《毛記電視》嘅員工一直都會自稱做「毛孩」，而普遍網友們又會稱呼自家有毛嘅寵物係「毛孩」。咁邊個打邊個啊？實撈埋晒啦！不過又唔怪得大數據嘅分析結果，因為真係好難分嘛！

image source:Facebook/100毛

7 毒L

毒L唔係新上榜嘅潮語，年年都流行，年年都有人講。特別係每逢佳節倍傷心，一人一句「其實毒L一個更開心」，都洗到數據上晒嚟啦！其實，喺香港地，「毒L」依個詞好應該入埋字典，因為相信「後生時唔好浪費時間，第時有錢你荒無女咩！」嘅人真係年年都有㗎！

image source:Youtube/babiv3v

6 套路

好明顯「套路」就係入口嘢啦，本來意思係講緊武術入面排好晒嘅一套動作，後來中國網民就用嚟講D精心策劃好嘅事，之後就傳入香港，廣受熱愛中國當代流行文化嘅人使用。等我都試吓用先：香港政府推行的「普教中」、「每日一百五」、「港珠澳大橋」等等的政策，全都是為了加速「去香港化」的套路！

image source:DV自製

5 大媽

「大媽」本身就係大陸人用嚟稱呼上咗年紀嘅中年婦女，係中性用詞，但依家好多香港人就用嚟揶揄大陸中年女性。香港人分得好清嫁！真香港嘅呢，就「師奶」，無咩文明概念嘅、廣東話都未講得好嘅、操流利普通話嘅，咪通通叫大媽囉！不過就唔可以用身分證嚟分囉，你明㗎啦！

image source:Youtube/我係香港人

4 仙氣

「仙氣」當然係形容女神㗎啦！自從2016年起，「仙氣」兩個字就潮足兩年，由之前嘲笑嗰位狂chur女神嘅師兄，變到依家常用嘅形容詞。如果我哋要形容心儀對象「有一種好特別既氣質，係出邊d女仔冇」嘅時候，要講咩？「冇錯就係仙氣」！

image source:網路流傳照片

3 食雞

上年好多香港人都鍾意「食雞」，就算你唔「食」，都聽過身邊人「食」！咁咩係「食雞」啊？就係熱門遊戲《PUBG》喇！因為玩依隻game，目標就係「食雞」！每埸拎第一嗰個，都會彈句「大吉大利，今晚食雞」，所以大家就用「食雞」去泛指依game同贏第一！

image source:Facebook/PUBG.Taiwan

2 小鮮肉

其實「小鮮肉」由大陸傳出到港澳台後，就愈嚟愈多人用，仲愈用愈普遍，愈用愈張狂！香港著名論壇「LIHKG」嘅巴打絲打們，就成日本開post笑「小鮮肉」依個「潮語」，放晒D動物圖嚟嘲諷！又啱嘅！「青靚白淨」就「青靚白淨」啦！小鮮肉？食物嚟㗎？

image source:DailyView

1 DQ

即係「Disqualified」（取消資格）嘅簡寫，而香港人主要用喺討論多人被取消議員或參選資格的時事。好開心香港人入面港豬嘅比例唔係想像中咁高，雖然口講「返工，不了」，但身體就好誠實！大數據顯示咁多潮語入面，「DQ」係最多人講㗎！證明香港好多人都好關心自己生活緊嘅地方！

image source:DailyView最貼地10大潮語！

香港嘅潮語真係博大精深！唔用網路大數據整理過都唔知原來香港嘅潮語真係好international啊，結合晒中港台嘅潮語！以前阿爸阿媽仲會去上堂學潮語融入自己仔女，其實學潮語使乜上堂吖！睇DailyView咪得囉XD

分析說明：

本研究資料分析時間範圍為2018年02月20日至2019年02月21日，共一年。

網路大數據系統觀測港澳地區上萬個網站頻道，包括新聞頻道、Facebook、Instagram、Twitter及各大討論區、部落格等，針對討論『香港十大潮語 』相關文本進行分析，並根據網友就該議題之討論，作為本分析依據。

本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。