生仔與否早有共識 奶奶恨抱孫 要挾新抱叫兒子北上另娶

生仔 不生仔成為近日熱門話題，有人覺得為人父母很大責任，未準備好生仔；有人認為有小朋友才算是完整的家庭。近日一名新抱在社交平台撰文，大呻被恨抱孫的奶奶催生仔。奶奶見催生仔不成，竟要挾新抱，如果她再不生仔，就會叫獨子離婚，北上再娶老婆。帖文引來很多網民留言，大家紛紛對奶奶的威脅行為表示不認同。

撰文：Clara｜資料授權：「生仔要考牌系列」｜圖片：SHUTTERSTOCK

新抱與老公有共識唔生

近日一名新抱於Facebook專頁「生仔要考牌系列」發文，她指她與老公10年前拍拖時已有共識不會生小朋友，一來他們不喜歡小朋友；二來生仔太大責任，他們不想負起為人父母的職責，很困身；三來他們害怕小朋友很難教：「唔通拋棄佢唔理咩？」。衝量過後，他們決定不生仔，然後才結婚。

奶奶恨抱孫要求生兩仔

如今該名新抱38歲，老公40歲。四年前起，她已被奶奶不停催生仔，她知道奶奶好恨抱孫，想傳宗接代，但細女40歲都未結婚，所以將壓力施加於家中惟一男丁──大仔身上：「起碼要生兩個，最好有個仔啦梗係。」

最近，新抱話奶奶催生仔的頻率比以前頻密，甚至要挾她：「如果你唔生嘅話，我會叫你老公返內地另娶老婆，反正我有咁多親戚喺嗰邊，一定有好多女仔介紹到畀你老公。」她非常不滿奶奶叫老公娶過第二個，當時她老公都在旁邊聽，但聽完毫無反應，連反抗都不敢，只會叫她息事寧人：「老人家講嘢係咁，由得佢，唔好理佢。」

奶奶叫獨仔北上娶老婆

新抱認為與老公早已有不生仔的共識，所以沒有理會奶奶的說話，但奶奶仍不罷休，還提出三個原因，希望說服她生仔。第一，奶奶指現在香港教育系統好完善：「最近學啲嘢非常豐富，可以教到班小朋友有正確思考嘅觀念，好適合生，真係唔驚唔識教。」第二，奶奶聲稱會資助他們：「學校老師一定會幫你，老爺奶奶亦都支持你，會資助你哋。」第三，奶奶認為政府福利好，有利生仔：「依家唔生好蝕底呀，政府有咁多福利，真係唔好輸蝕，呢個咁幸福嘅環境要好好珍惜。」

事後新抱態度樂觀，她認為奶奶的要挾不足為懼，萬大事都可以回娘家，又慶幸與老公堅持不生仔，否則一定會「家嘈屋閉」：「如果老公真係聽佢阿媽講，娶過另一個，咪由佢囉！反正有外家可返，除咗父母，我家姐、姐夫亦都好歡迎我，真係唔使驚老爺奶奶喎。好彩我哋唔鍾意小朋友啫，如果我哋生咗嘅話，奶奶一定會插手多多事幹，到時候仲麻煩呀！」

網民勸奶奶自己生仔

不少網民熱議，有網民斥罵該位新抱的老公很懦弱：「嫁個懦弱老公，唔敢同阿媽講清楚，註定無好下場」、「老公冇用，無同屋企人表達清楚係無打算生，要個老婆受氣」、「叫你老公係呀奶奶同一大班親戚面前，話自己睇咗好多年醫生都醫唔好不育，唔好再叫你哋生，之後就應該全個世界安靜晒」

有網民則提議奶奶自己生，或者介紹內地女生給老爺：「強列建議益老爺！叫佢返去揾多個老婆生！」、「問奶奶點解生一個仔咁少，梗係生多幾個保值啦，而家科學昌明，叫奶奶通經自己生番夠本啦」、「生生生！咁鍾意生就自己生飽佢啦。」