金像獎紅地氈｜古天樂坐Uber Taxi壓軸出場 盼更多年輕演員獲獎

有份角逐金像獎最佳男配角的古天樂（古仔）壓軸出場，他乘坐Uber Taxi型爆現身，古仔戴住黑超穿西裝受訪，當沈殷怡問他：「有冇啲乜嘢要提提現場觀眾及家庭觀眾要留意？」古仔只說：「一定要坐Uber Taxi，輕鬆方便，Skip走唔少煩惱。（準備啲嘢食？）記得坐Uber Taxi。」

古仔及後接受陳俞希訪問，談到《九龍城寨之圍城》在日本受歡迎，他說：「票房好當然開心，知道唔同地方都好鍾意，尤其係日本，亦將叉燒飯加頂帽傳到去日本，我都好開心。」問到他和伍允龍一同競逐最佳男配角，他說：「其實入圍係肯定，邊個攞獎都係開心事，無論係我哋部戲或其他戲都好，我最希望多啲年輕人去攞獎。」

（即時娛樂）