洪嘉豪拍MV自肥揸愛驅　親身上陣日本賽道「試車」

洪嘉豪（Kaho）剛推出2024年第一首新歌《黑玻璃》，早前推出的單曲封面令人有《頭文字D》感覺，原來MV真的在漫畫中的賽道碓冰拍攝，愛車的Kaho可以自肥大過車癮。團隊更挑選幾個要攀山涉水才能夠去到的靚絕景點，除了新海誠的動畫《你的名字》中描繪的長野縣諏訪湖，更登上日本「百名山」之一的霧峰最高峰、位於海拔1,925公尺的車山神社取景，

「今次《黑玻璃》MV去咗日本揸車，亦係我呢5年嘅歌手生涯第一次出埠拍MV。由於歌曲係講車嘅，所以今次MV就決定揸車，亦都想畀人知道我鍾意揸車嘅呢一面。」對車頗有研究的Kaho對日本車情有獨鍾，思前想後終於挑選Honda FL5作為MV的第三個主角。早前考了棍波車牌的Kaho一坐上dream car即非常興奮，每一幕揸車場景都要自己親身上陣，更豪言一定要買這部車。

今次的MV亦甜度十足，一反Kaho過往MV的慘情情節。Kaho大讚女主角：「女主角Ocean本身係一個中文教師，亦有參與一啲演員嘅工作。今次好多謝佢，因為好多時我做一啲甜蜜啲嘅鏡頭都會有啲尷尬，反而佢今次係lead住我，所以合作非常之順利。」

今次新歌得到不少專頁分享，更得到世一劍手張家朗分享。「可能因為今次我揀嘅呢架車係一架識車之人都會respect嘅一架車，我都見到張家朗哥哥有分享到。以我所知佢都有玩車嘅，可能係因為咁而得到佢的repost啦，我都有同佢say咗個thank you，大家都叫做因為車而認識咗，希望有機會可以認識佢啦！」。

Kaho今年4月13至14日將首次登上紅館舉行演唱會，前年已經在西九舉行過大型演唱會的他，今次已調節好心態：「其實一直都開始鍛鍊，今次唔想畀咁大壓力自己，都會盡力做但未必會閉關，每日都會做吓訓練準備好自己。」