成日聽男仔講話要追女神，要有樣有身材，又要溫柔體貼，好似倪晨曦同Ali咁就perfect啦！但係追到手之後又呻湊女神好麻煩，同佢出街又貴，又要求多多，仲要超級港女…（下省100項投訴）計我話想揀女朋友又想貼地得嚟相處舒服嘅話，識揀一定揀麻甩女漢子！
我知你地一定會話「唔係掛，成個男人咁，我鍾意女仔㗎喎！」我所指嘅麻甩女漢子絕對唔係完全不修邊幅然後由朝到晚宅在家嘅女仔（要知世上無醜嘅女人只有懶嘅女人，如果啲女仔自己都選擇放棄自己都無人幫到佢！）我所指嘅麻甩女漢子係指性格上直率爽朗，大情大性，十分真性情嘅女仔。可能你會覺得佢哋好男仔頭，但其實禾桿冚珍珠，筍盤嚟㗎，記住唔好走寶！
真性情不會小心眼
同女神BB唔同，麻甩女漢子一啲都唔扮嘢，唔洗扮矜持又唔洗扮斯文，有個句就講果句。率直嘅性格可能會令佢哋脫罪人多，但同時你唔需要擔心佢扮嘢虛偽。面對其他人對佢哋嘅嘲笑諷刺，佢哋通常會選擇以牙還牙寸返你轉頭。呢種互寸嘅溝通方式，其實都係一種情趣啊！
不介意素顏
留意返係不介意！！！要強調不介意因為好多人會認為麻甩女漢子「從來」唔化妝打扮！但其實佢哋都會化妝都會扮靚嘅，但可能只限特別日子（例如生日、朋友聚會、飲宴等）。唔介意素顏嘅同時意味著你唔需要驚佢會妝前妝後兩個樣！成日見到網上討論區出現「女朋友落咗妝唔認得佢」嘅情況，要避免呢種「世紀大騙案」最好嘅方法咪係搵個會素顏嘅女朋友。講真吖，如果次次同女朋友出街佢都重裝甲，又假眼睫毛又濃妝抹艷咁，都唔好話唔驚！
脾氣來得快去得快
就係因為率直嘅性格，口直心快嘅佢哋有咩都會照直講，唔會將事情放喺心入面。相比起你要估佢哋嬲咩嘅女神BB們，同麻甩女漢子相處實在舒服得多。脾氣都嚟得快去得快，嬲完你鬧完你，轉個頭又可以friend過打band，你絕對唔駛估估下「佢究竟嬲咩」或者「係咪我激嬲佢呢？」
超級反差萌
其實幾硬朗男仔頭嘅女仔都有可愛少女嘅一面，麻甩女漢子都唔例外。只係可能佢哋少女嘅一面收得比較埋，但如果你有能力駕馭佢嘅話，你都會見到佢girly嘅一面。呢種反差萌相比起永遠都走可愛風嘅女仔更吸引人！
**Follow us on:
- Facebook: CosmoHK
- Instagram: @cosmopolitan_hk
- YouTube: CosmopolitanHK**