武漢肺炎，香港地震
香港喺2019年社會變化咁大，好多人都寄望2020年，香港會變得更好，等大家都可以抖抖。又點知道，香港好似犯咗太歲咁，2020年啱啱開始咋，中國武漢肺炎就殺到埋身，九龍新界無得避，全香港上至特首，下至老百姓，個個都要戴口罩，唔係隨時都會中招。大佬，中咗招，香港仲未有藥可以醫㗎，緊係個個都怕。不過，武漢肺炎引發嘅社會影響好多，唔止口罩嘅！今日DailyView就以網路大數據排行嘅香港「網路熱度排行榜」，話你知武漢肺炎之中，香港網民十件最關心嘅事喇！
DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。
NO.10 裁員（2621筆）
——政府係時候出手
睇返當年沙士，市面蕭條，出現咗大型嘅裁員潮，令好多人連生計都有問題。武漢肺炎相對沙士仲嚴重，好多企業都估計會出現裁員潮，好似而家香港航空業已經開始裁員400人，皇悅酒店裁員60人咁，呢個只係啱啱䦒始咋。好多網民都話，面對咁嘅情況，政府一定要出手幫企業頂住。政府方面，就話會審視不同措施嘅適切性。
網民：「希望自己唔會俾人炒，好擔心。」
image source:FB/Yahoo 新聞
NO.9 營業時間縮短（4057筆）
——出門口之前記得查查
武漢肺炎爆發，香港嘅公營機構、商店營業時間縮短，皆因好多人都出門口，而員工都擔心自己安全，都係唔開好過開。香港Apple Store縮短咗營業時間，令服務大受影響。周大福、謝瑞麟、莎莎、六福、周生生，好多分店都停咗，或者改咗營業時間。譚仔三哥、譚仔、大快活都宣布咗唔同嘅營業時間，去食之前記得小心睇睇先喇！
網民：「唔出街就唔驚無開喇！」
image source:FB/譚仔三哥米線
NO.8 股市動盪（4082筆）
——早日離場
香港，以股票投機炒𧶠知名世界嘅城市，面對社會變化，疫情嚴重，自然都大受影響。早前香港股市就因為武漢肺炎爆發，搞到唔少股票都下滑收場。但世事難料，股市都一樣，恒生指數時升時跌，真係唔係一般人可以估計到。網民見到情況咁特別，就話好似《大時代》咁，都係早日離場，唔好以為自己係股神，隨時連棺材本都無。
網民：「又話疫情勁，點解又會升？」
image source:FB/BBC中文网
NO.7 活動取消（4362筆）
——咩活動都要取消
香港人，都係留喺屋企算數喇！點解咁講？皆因出門口，其實都無活動可以參加。香港政府自從宣布應變級別提升至「緊急」嘅最高級別，取消晒所有大型活動，好似香港馬拉松賽事、元宵晚會咁，而政府主辦嘅各類新春酒會都取消埋。其實邊止政府，好多私人活動都自動取消。網民就講，今時今日仲出街，唔通真係唔驚死？
網民：「睇怕之後嘅演唱會都無晒喇。」
image source:FB/渣打香港馬拉松 Standard Chartered HK Marathon
NO.6 學校停課（7292筆）
——停課不停學？
香港政府早前宣布嘅防疫措施，包括咗幼兒園、中小學及特殊學校等將停課到三月二日，而香港嘅大專院校都有跟進，停止學校課程，轉做網上教學，真係停課不停學。另一邊，澳門已經講咗會無限期停學，香港網民好多都話，希望香港政府都咁樣做，因為而家疫情先爆發無耐咋。如果正式開學，咁多人會面交流，真係相當危險！
網民：「口罩都唔夠用，仲開學做咩？」
image source:FB/香港電台視像新聞 RTHK VNEWS
NO.5 物資短缺（13034筆）
——樓下已經連米都無
香港人，因為武漢肺炎疫情嚴重，搞到人心惶惶，已經無咩理性存在，實行咩都搶購！柴米油鹽，買成堆係屋企，唔出街可以食成個月。廁紙，有消息話供應商會停，即刻狂掃。搓手液、漂白水、消毒酒精、濕紙巾⋯⋯到底香港仲有幾多物資會無晒？物資短缺到呢個情況，但政府依然以市場自由為理由唔干預，難怪網民話已經對政府無期望。
網民：「唉而家真有錢都無用，出街都無嘢買。」
image source:FB/Stand News 立場新聞
NO.4 家居隔離（42720筆）
——留喺屋企最安全
香港隨住武漢肺炎爆發，唔少人都由內地到咗香港，自然都有患者出現喇！政府面對疫情，宣佈將按6種唔同嘅情況，實施各種程度嘅隔離、檢疫措施，其中最引起網民注目嘅，當然係去過湖北省嘅人必須佩戴嘅電子手環，好多網民都批評手環簡陋。而由內地返港嘅人，14日都要留喺屋企自我「隔離」，網民又一面倒問，靠自律真係有用咩？
網民：「隔離緊係要強制先有用，唔強制有鬼用咩？」
image source:FB/DDED
NO.3 口罩缺貨（115725筆）
——2盒thx
自從武漢肺炎爆發，全世界都搶購口罩，好多地方都已經買唔到口罩，而香港情況都相當嚴重，去到一罩難求嘅境地喇！又有邊個諗到，香港人要悲慘到排隊買口罩，食炒價，上網鬥快鬥運氣嘅地步？有網民見到有香港人排咗成日隊都買唔到口罩喊咗出嚟，都身同感受，因為真係好難買呀！政府話係自由市場唔干預，網民嬲到爆，唯有希望口罩早日返貨喇。
網民：「又無貨，又要捱炒價，到底政府做緊咩？」
image source:FB/高登討論區 HKGolden
NO.2 罷工（166960筆）
——無工具點救火
香港醫護工作人員，面對疫情嚴重，而政府慢半怕堅持唔封關嘅反應，佢哋決定以罷工做手段，希望令政府順從民意。不過，網路上對醫護罷工都有唔同睇法，反對嘅，指責佢哋係黑護，無醫德，視病人利益為無物。支持嘅，就形容醫護係為咗香港好，因為封關先係真正有效嘅手段，可以阻止疫情爆發。近日有唔同工會都打算罷工，唔知政府又會點回應呢？
網民：「罷工雖然唔太好，但如果封咗關，咪咩都解決囉。」
image source:FB/眾新聞
NO.1 封關（416528筆）
——點封都唔封晒
面對疫情，各個地方都有唔同做法，但係萬變不離其宗，分咗「防疫」同「抗疫」。前者，係講疫情傳入爆發之前，用一切手法去阻止呢件事發生；後者，則係針對疫情爆發之後，點樣去面對呢種情況。喺武漢爆發肺炎，好多香港網民都要求政府封關，甚至有醫護為咁發起罷工。可惜嘅係，政府到今日都只係採取部份封關政策，引發網路上大批嘅批評聲音。
網民：「有咩可能唔從源頭阻隔？當香港人條命係咩？」
image source:FB/SocREC 社會記錄頻道
【香港網路溫度計調查結果之圖文，未經授權請勿轉載、改寫】
分析說明：
本研究資料由《KEYPO大數據關鍵引擎》提供，分析時間範圍為2019年11月15日至2019年02月12日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『武漢肺炎港人最關注10件事』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。
留言 0