【蘇跑旅遊】石塘咀文藝半日遊　嘆完啡再欣賞經典拍攝場地

由於疫情關係，好多打算到外地旅遊嘅計劃都要取消，想到特色小店享受寧靜假期唔一定要到海外，香港本土亦有唔少清新Cafe選擇。今次同大家到石塘咀，嘆完咖啡再到附近閒遊，感受文化氣息同欣賞電影拍攝場景之地。

咖啡店位於石塘咀南里14號，充滿田園風格嘅Cafe 14 South Lane深受文青歡迎。店內多以簡潔白色布置為主，柔和舒適嘅光線穿透落地玻璃，增加室內寬敞空間感。

南里曾經是香港最繁華的地方，路旁多條道路係風月行業盛行的街巷。1903年港督彌敦鑑於水坑口街的衛生和火災後重新安置的問題，加上打算開發新填海的石塘咀一帶，於是就勒令原本在水坑口街的妓寨要在1906年前全數遷往當時仲係好荒蕪嘅石塘咀，起初妓寨生意冷清，經過一段時間先興旺起嚟，仲帶動唔少酒樓食肆同其他相關行業進駐石塘咀。

日本佔領香港之時，塘西的風月場所又再興起，當時石塘咀被改名為「藏前區」，而一些新妓院也起著日本色彩的名字，如「天香館」、「華麗都堂」、「天外天」等。不過自上世紀三十年代禁娼後，再加上社區的不斷發展，石塘咀已蛻變成一個普通的住宅區，現在已找不到昔日紙醉金迷的歷史痕跡。咖啡店正好位於新舊交集，早年香港煙花之地，甚具文化色彩。

店內提供沙律、烘焙麵包、漢堡及其他主食，配以新鮮果汁，清新健康。雲石餐枱與木系椅子，充滿美感，享受慢活恬靜的下午。食物多以有機和健康食材為主，今次記者試咗牛油果多士，上面配上清新豆苗再加酸種麵包，同牛油果好夾。 

咖啡店附近一帶更是電影《胭脂扣》取景嘅地方，如花（梅艷芳）與十二少（張國榮）之間的戀情就在這個昔日的煙花地開始和終結。

14 South Lane

地址：石塘咀南里14號

營業時間：星期一至六上午8時至下午5時（星期日休息）

嘆完咖啡想四周閒遊，附近有間菲林相機店，可以介紹畀鍾意影相嘅朋友。店內有菲林沖掃服務，影完啲靚相可以即時沖曬，留為紀念。

YatGyun 一捲

地點：石塘咀山道66號適安大廈2A地舖

營業時間：星期一至日下午2時至晚上9時

相信大家有睇過《春嬌救志明》，其中一個場景就西環碼頭。呢度更有機會拍攝到「天空之鏡」，唔少攝影發燒友來此除拍攝日落，下雨後亦愛憑藉地下水影，用鏡頭拍出倒影，充滿美感。

西環碼頭

地點：石塘咀干諾道西與山道之交匯處以西的海旁

開放時間：上午7時至晚上9時

撰文及攝影：蘇兒（Zoe）

鍾情於打排球同跑步嘅女生，閒時環遊世界發掘美景。期望可以跑晒世界上有名嘅馬拉松。