效力16年！35歲楊秀惠離開無綫

現年35歲嘅楊秀惠現早前榮升人母，現正喺家鄉馬來西亞坐月。不過，原來佢已經離開效力16年嘅無綫，而現時正熱播嘅《十八年後的終極告白》係佢嘅告別作！

楊秀惠除咗無綫工作亦有美容事業，近年佢仲全力投入搞生意，為咗生意及家庭上雙線發展，加上唔想做啲狐狸精角色，接劇時都要諗過，不過似乎未如理想，除咗《十八年》飾演啞女一角有所發揮外，其餘演出都係小角色，令佢萌生去意。有傳佢去年中想賠錢走人，但無綫再三挽留佢，所以再簽約一段時間。

而喺呢段時間，楊秀惠極速結婚兼生B，但最近因疫情令佢一直未有歸期，工作大受阻滯，所以即使未完約，無綫都同意楊秀惠賠錢提早離巢。