男友寧願瞓覺都唔撐場！「浩南」唔怕入行有誘惑

ViuTV選美節目《最後一屆口罩小姐選舉》雙料冠軍「浩南」鄭伊琪現身街市，為早前承諾社交網超過4,000個like表演斬雞「找數」，透露獲不少市民及粉絲到場支持，問到一個鐘斬了多少隻雞？她笑說：「斬咗10隻，雖然冇經驗，但平時煲湯有斬豬肉。（廚藝好叻？）煮中菜同煲湯叻啲，男朋友都有讚。（想用廚藝箍住男友？）我自己鍾意食嘢啫！」

問到獲獎後可會加入娛樂圈？浩南表示：「都期待，有同Viu傾緊合約，希望喺綜藝節目方面發展。（想唔想拍劇？）如果唔介意我冇演戲經驗，都可以嘗試。（男友冇嚟支持？）瞓緊覺，其實我參選時都冇嚟，之後先會睇Playback，但當我有唔開心，佢就會畀個膊頭我喊。（入行唔怕誘惑？）我哋對大家都有信心。」

東網網站 : https://on.cc/

東網Facebook專頁 : https://www.facebook.com/onccnews/