歐聯十六強次回合賽事，阿仙奴主場對戰波圖，首回合落敗0比1嘅阿仙奴，開波頭7-8分鐘一度被對手壓制，及後慢慢入局不斷嘗試創造機會，直到41分鐘阿仙奴一次進攻，奧迪加特(Martin Ødegaard)係左路Half Space劏個直線入禁區，杜沙特(Leandro Trossard) overlap入禁區攞到再窄位射入，成功扳平比數1比1。
入球後阿仙奴有返氣勢，擺脫畏首畏尾嘅感覺，然而球隊經常被波圖嘅「倒地」戰衛同防守反擊中斷進攻，直到83分鐘捷西斯(Gabriel Jesus)換入先再掀起高潮，當時一落場就有一次起腳相當近磅，只係被門將提前出迎封擋。
雙方喺90分鐘內未能分出勝負，需要進入加時階段，但基於體力問題兩隊係加時階段都無太多具威脅嘅埋門，最終兩隊需要以十二碼分出勝負，其中阿仙奴嘅奧迪加特、薩卡、杜沙特同懷斯都射入十二碼，同時間門將大衛拉也(David Raya)兩次成功撲出對方射門，結果阿仙奴十二碼以四比二擊敗波圖，打破魔咒，繼2010年後再度晉級歐聯八強。
雖然對住實力有相差嘅波圖要踢到十二碼先分出勝負，應該係一眾球迷意想不到嘅結果，但實際上呢隊波圖戰至加時階段，仍然博盡甚至有衝刺嘅時候，可見波圖球員對勝利嘅渴望，因此波圖可以講係唔容易對付。至於阿仙奴方面今日最有火嘅球員絕對係隊長奧迪加特，既交出致命直線，又勤力全場跑，絕對係球員嘅榜樣。最後阿仙奴再下一城，仍然要兼顧歐聯同英超賽事雙線作戰，希望佢哋能夠保持勝軌。
▼Follow 足球港場
Instagram: https://www.instagram.com/footballarena_hk/