政Whats噏：私隱署無人坐鎮　「行政命令」英文翻譯出錯

個人資料私隱專員公署(公署)尋日(8日)喺網上發放新聞稿，話美國政府公開港府官員嘅個人資料屬過度同不必要，批評美國政府嘅舉動形同「起底」，有可能會導致相關嘅個人資料被非法使用。雖然公署係批評美國政府，但自己都「甩轆」，出現翻譯錯誤喎。

公署嘅新聞稿指出，美國財政部嘅公布由聯邦公報(Federal Register)公布行政命令。但新聞稿將「行政命令」錯誤翻譯為「Execution Order」，被發現後再急急改返做「Executive Order」，就冇提及公署寫錯，或者幾時寫錯喇。其實新聞稿發放前，不同機構都會檢查清楚有冇錯漏，點解今次咁疏忽呢？

話說前個人資料私隱專員黃繼兒喺上個禮拜一(3日)任期屆滿，而接替黃嘅公司註冊處處長鍾麗玲就喺下個月4日先履新，搞到公署出現一個月嘅「真空期」。莫非真係冇人坐鎮所以公署就唔掂檔？

東網網站 : https://on.cc/

東網Facebook專頁 : https://www.facebook.com/onccnews/