喺專輯《Inner | Child》同演唱會作出眾多新嘗試後，嘉豪今次回歸招牌情歌，道出受情傷後想收埋自己嘅心情，心酸貼切。
「別要講心事 分享噴漆的照片 最新配件 多忠貞的鋼鐵 踏實的速度 這就是諾言」
面對失戀，比起年少時一班人嘻嘻哈哈，呻一輪就可以渡過所有情緒。人大咗對住其他人，往往習慣將內心真正感受深藏，寧可講啲無關痛癢嘅話題，甚至一言不發。可能係怕影響別人，可能係事情太一言難盡，又或者只係單純唔想表達，反正唔會有人明白，亦唔需要人地明白自己。
「難道會過得不快樂 朋友憑什麼猜測講出我感覺」
有時太多慰問反而會成為負擔，我地最需要係一個獨處空間去處理情緒，放空地沉澱消化，無餘力去社交，對所有事都感到煩厭，只想隔絕世界，讓時間快點過去。
內心仍然交戰，傷痛欲絕，尚未忘卻到曾經深愛嘅人，不停說服自己情路上人來人往其實正常不過，想證明失去對方一樣可以活得安好，無咩大不了，慢慢接受經已分離嘅事實。過程雖然痛苦漫長，無奈必須要經歷，但捱過後總會企得返起身，變得更強大地走未來嘅路。
「開心 高興 喝酒 不准囉嗦 就這麼 各取所需娛樂 吃人間煙火」
如果身邊有朋友為情所困，與其不斷主動送上關心，倒不如簡單地表達你唔會打擾佢，但需要時一定會陪伴在旁，保持令彼此舒適嘅距離，咁樣已經係最大支持。
「然後 我差不多可醒覺 差不多可操作腦袋 將舊事遺忘 今天不要再煩我」
洪嘉豪嘅情歌向來到肉，帶出滿滿共鳴，《拜託》亦唔例外，演繹同題材仲多咗份成熟味，唱到個種療傷初期嘅頹廢感覺，為樂迷抒發內心感受，非常適合院長，越聽越上癮。
嘉豪今年嘅作品包含各種類型，不斷作出突破，亦相當受歡迎，吸引咗一眾新粉絲。希望今年可以再出多幾首作品，讓樂迷一飽耳福之外，再全力衝擊獎項！
「非常絕對過得很快樂 無人期望他關心 沒意思 共勉之 所以拜託」
最後，下次當有朋友失戀時，除咗提供足夠嘅空間，不妨用音樂代替說話，分享幾首院長嘅情歌，讓佢地從作品中找到一點安慰。
《拜託》 洪嘉豪
曲：Larry Wong
詞：陳詠謙
編：Larry Wong
監：Larry Wong
「總之不要再煩我 拜託拜託
但求有些音樂 直落直落
難道會過得不快樂
朋友憑什麼焦急想跟我口角
真的不要再明我 拜託拜託
喝完這打酒可不可
非常絕對過得很快樂 無人期望他關心 沒意思
共勉之 所以拜託」
▼Follow hkpopculturelover
Instagram: https://www.instagram.com/hkpopculturelover/
留言 0