釗峰離巢跟「惰性」有關 跳出安全網感忐忑 自認大男人愛逞強

梁釗峰2009年以組合C AllStar出道，2011年伙隊友簽約寰亞走紅，再於2017年，休團變個人發展。今年4月宣布約滿，轉做自資獨立歌手，離開合作超過13年的娘家。

釗峰為首支獨立作品《情緒價值補給員》接受商台《星光背後》梁泰來訪問。節目中，釗峰詳述離巢主因：「我有惰性，呢10幾年太舒適，再簽約又係唔係一樣呢？想趁仲係3字頭闖下，如果再簽約，再過幾年我係唔敢試。」

他感激公司多年栽培，亦承認為跳出安全網感到忐忑，釗峰說：「都要計數，你問我驚唔驚，驚㗎！」節目中，釗峰罕有談及感情，他否認早前有指4年半地下情曝光後「見光死」的說法，不過，接受訪問後1周，他與Karen戀情告終。

釗峰近年迷上越野長跑，談及在樂壇「長跑」經歷，他於C AllStar年代比其他兄弟跑得快，及至近年被隊友陳健安或同公司馮允謙超前，問到釗峰離巢，與同公司歌手之間的競爭有沒有關係，他說：「我冇諗咁多，成功嘅公司，如果你配合到，係天時地利人和，打橫瞓都會紅，啲歌都會OK，我真係冇咁諗。」

至於安仔有今天成績，釗峰一直替對方高興：「C AllStar時畀人感覺我突出，因為 《天梯》，又或者個人發展我派歌快啲。組合嗰陣會在意啲，或者會有比較，因為大家同一起步點，除咗想兄弟有掌聲，亦想啲掌聲落喺自己度。但到2017年休團獨立之後，我打消晒呢啲念頭，會真心戥兄弟開心。」

馮允謙或安仔已成功開了個唱，釗峰真心為好友高興，他說：「好記得安仔疫情開咗一個冇觀眾嘅網上騷，我喺廠睇佢嘅騷，到中尾段，我係畀佢感動到流眼淚，大讚佢『好叻仔呀！』，絕對冇諗點解佢會開騷先。同佢經歷咁多，覺得佢啲歌好聽，嗰刻我亦覺得自己大個仔咗。」

至於馮允謙，原來入寰亞後，2人亦成為好兄弟：「Jay Fung呢個兄弟同C AllStar有啲唔同，我會稱呼佢係細 佬，我緊張佢嘅成績，仲著緊過其他兄弟。我哋係傾偈擔當，係大家嘅《情緒價值補給員》，會互相比意見。比如之前我計劃獨立離開，佢成日陪住我，認識Jay Fung，係我入寰亞不可多得嘅事，多咗個little bro。」

釗峰對感情事一向低調，早前被揭地下情，事緣其拍拖4年半的圈外女友Karen，無預警於社交平台上載多張親密合照，之後有報道猜測2人關係「見光死」。

節目中，釗峰談及吸引他的異性條件，他說：「最重要心地善良，同埋肯講對唔住，一個肯講對唔住嘅人，係對我有好大吸引力，因為會顧及人感受。」他指女友很吻合，「佢好肯講對唔住，一開始已經好了解我，大家會代入雙方思考，會考慮人哋點諗。我哋唔會隨便發脾氣，只要唔動氣，大家就無事，我哋成日傾呢啲嘢。」

至於女友貼相令關係曝光後，他有沒有生氣？「我又冇！真係冇！反而會同佢傾，如果呢個階段你想公開，just go ahead。只係後來收到朋友電話話啲相太過親密，先至知咁做或者會影響外間觀感，就同佢講唔好再post啦，反正大家都知道喇。」

釗峰除了承認事件沒影響2人關係外，亦直認自己大男人。他一直把關係低調處理，只是想保護這段戀情：「大男人？我算呀！我係大男人，因為我驚無能力照顧我身邊嘅人，所以我要逞強！我唔係要你乜都聽晒我講，但我驚你唔聽我講而出咗事，咁我就保護唔到你，我會仲擔心。因為佢唔係圈內人，扯咗佢入嚟，我會好難保護對方。」

快到「男人40」的釗峰，亦因大男人主義，所以未有結婚計劃，「我成日認為事業要達到一個點，先會諗（結婚），未能夠畀到穩健、舒適嘅空間畀你身邊嘅人，就唔會諗住。」現階段釗峰只想專注勇闖獨立歌手的路。

訪問後1周，釗峰女友於網上先稱失望搬走分手，釗峰隨即網上回應證實，更說：「分手，難過事。不要曲解，沒有回應不等於默認這回事。」至昨天他再在社交平台發公開信，分別給Karen及傳媒交代感情風波。

（即時娛樂）