三命｜方以文訪問蘇家樂　難忘面對阿龍死三次︰要一晚拍晒

人愈大愈難自選，駱澤信每個選擇都令三條命愈行愈遠，但始終都離唔開家庭同朋友嘅羈絆。飾演成年時期的駱澤信，覺得駱澤信係個幾固執同認真嘅人。「當然三條線嘅程度唔同。我演嘅三個駱澤信係去到31歲，佢到呢個時間都好清楚自己想要咩，但有冇隨住自己嘅心去行，就三條命可能各有不同。」

方以文IG︰www.instagram.com/fongemantvman

蘇家樂：「我最鍾意出獄同阿媽陳佩思重逢嗰場戲，好感動，最大挑戰係唔可以落淚。阿媽愈喊得勁，我就愈想喊，但都要死忍，因為『黑信』唔會咁表達。我內心就不斷滾動，到呢段出街我睇返，我自己都喊咗出嚟。當刻覺得好似忍咗4年咁長 。」（按：《三命》喺2021年開始拍）

蘇家樂講過同Helen譚凱倫嘅床上激戰好高難度，原來仲有另一場佢都覺得好難。「除咗同Helen嗰場戲，我估最難可能係三場阿龍死嘅戲， 因為面對一個由細到大嘅好兄弟死亡、面對呢種大事件，都係要演返駱澤信最直接嘅反應，但唔同嘅駱澤信嘅反應係唔同，加上嗰三場戲係同一晚拍，真係人都癲。」

我覺得青年駱澤信已經癲癲哋，成日好似嬲咗全世界咁，講嘢冇尾音。除咗見到四眼狗Carol同埋全力投入畫漫畫嗰時眼神有返光芒之外，其餘時間都好壓抑。如果要蘇家樂揀，佢想駱澤信生活喺邊條命？「呢個問題，每次答都有唔同感覺。有時會想行黑社會，因為係自己最唔熟悉嘅領域，好想了解同感受下。有時人生太大起伏嘅時候，又會想穩定啲，行下公務員線。但呢一刻，比較想行漫畫家嘅路，自私地為自己活一次。」可惜光芒四射嘅小英雄，好似只可以喺漫畫世界出現。

蘇家樂：「《三命》提供咗個好好嘅機會畀我去思考人生。成日話人生無得揀，咁有得揀又點呢？畀機會你睇多啲，以上帝視覺睇一個人，你又真係會識得揀？」咁即係覺得人生係整定？「我覺得人生係選擇題，唔同嘅選擇會引發出唔同劇情。命係一條條寫好嘅線，運係串連去唔同線嘅選擇。」