尋找跑會的故事 #24 | 330跑會．輕輕鬆鬆330?

呢個跑會自稱「330跑會」，到底係要全馬做到330先有資格加入，抑或加入後可幫你做到330呢 ? 我哋即管嚟睇真啲。

成立大概6年嘅「330跑會」由天水圍街坊 Dan Sir 所創立，最初只與街坊跑友們自行操練，日子久了，竟漸漸受到更多街坊跑友們嘅青睞，聚沙成塔，形成咗今日於天水圍跑圈內廣為人知嘅「330跑會」。唔知算唔算賣點，但肯定多一份敬佩，「330跑會」係免費的，只要有心有火有目標，行入去天水圍運動場搵 Dan Sir，無任歡迎!

Dan Sir 成立「330跑會」嘅目的純粹得可愛，因親身感受過日本人對馬拉松嘅著迷與認真，繼而於天水圍撒下同樣嘅種子，淋水灌溉讓其拙壯。單憑一份對跑步嘅熱愛與執著，開班授徒似乎多咗份架構式嘅尊卑，何不無分你我相互切磋與分享來得瀟洒 ?!

一直對工餘時間仍不遺餘力去經營跑會嘅教練們有多一份莫名嘅尊敬。今時今日活於此地要有一份安穩嘅工作到底屬易或難 ? 唔識講亦唔敢亂講，只感到當下生活比以往日子多一份難以言喻嘅憂慮。所以，不為金錢利益而無私奉獻出時間與精力去傳授武功嘅大俠們，無疑需要更多嘅愛與誠。

教練義教兼免收學費，以為嚟嘅都係食飽飯無事做落樓下 hea 跑兩圈嘅街坊? 眼鏡碎片再次一地都係，目測全部熱血仔女，sub 3高手以至初階新手濟濟一堂，嗰盆熱血加嗰份投入令我同試跑員二號 Gabriel 不得不嚴陣以待。諗過度過嘅 program、悉心嘅分組、學員嘅全情投入及自律，令我再次明白「有咩教練就有咩嘅學生，就會成就一個咩嘅跑會。」

還以為因為免費，故以330為門檻來擊退一眾白撞，原來苦心一片。Dan Sir希望入得嚟嘅人都帶著一團火，一個目標，今日做唔到330其實完全唔重要，做人最緊要有目標有視野，330作牌頭，行得入嚟就要有方向，開宗明義目標為本，同一天空下同一條起跑線一同朝330進發，那管今天只係430甚至530，呢度總有一班熱血街坊跑友從旁助燃。持之以恆，堅持到底，總有一天330，甚至超越330。呢種態度又豈止適用於跑步之上 ?! 「330跑會」有句口號 -「輕輕鬆鬆330，開開心心每一天」唔知底蘊嘅會覺得有啲囂張，但嗒落有味，背後大意義原來滿滿正能量，有意思 !

The post 尋找跑會的故事 #24 | 330跑會．輕輕鬆鬆330? appeared first on Fitz 運動平台.