《女神配對》淘汰兩男 林俊其驚變「老鼠屎」獲Yuki力撐

無綫戀愛綜藝真人騷《女神配對計劃》，昨晚（13日）播出第6集，本集除了有女神羅毓儀Yuki組的「三角枱約會」最終回，還宣布首輪遊戲淘汰者—梁敏巧組的Andy哥及關嘉敏組的Andy仔。

至於Dating Camp熱身環節—估睡衣遊戲，上回講到GM憑「蝴蝶結」成功推敲出Sophie睡衣款式，結果三子—─林澤謙Him、曾展望GM及富二代林堡熙Eddie，以4秒抵達Sophie帳篷，GM甫抵步即大嗌Yes；自稱是「古代新娘子，喺閨房等新郎」嘅Sophie，亦被醒目又敏捷的組員們逗得開心：「使唔使咁快呀？」

被問到對Sophie穿Lolita風睡衣看法時，GM說：「見到佢咁著嘅時候，我就覺得，幾可愛！」而Eddie則怕醜表示：「Sophie著嗰件睡衣我唔係好敢望太多地方嘅，我比較Focus喺塊面，我驚我望其他太猥褻。」

另一組「氣氛擔當」，則是Yuki組的林俊其、海淦清T.MAX及陳衍丞Kenneth。話說對Yuki一見鍾情的Kris，一來便直覺估中Yuki是熊仔睡衣，可惜卻因不相信製作組順攤而拿不定主意：「呢個擺到明係Yuki，但應該唔會咁簡單。」之後開始大包圍亂估其他款式，幸好T.MAX突破盲腸、找出「答案之睡衣」：「我早幾日睇到Yuki彈結他片，佢間房嘅色tone係白色，咁啱呢件（睡衣）就係掛喺個白色櫃前面。」

而Kris的「自我質疑」也沒有錯，3人抵達Yuki帳篷時，碰巧細John和Matt估錯關嘉敏穿熊仔睡衣、一邊急著離開一邊大叫「唔係佢呀！」神推鬼㧬下竟令Kris誤以為自己組也走錯帳篷，並拉著2名組員急跑離開，最終要靠頭腦清晰的T.MAX分析，3人才成功重返Yuki帳篷，最終Yuki組因來回浪費太多時間尾二收場，累街坊的Kris事後向製作組表示：「你知啦，我好想得到同房嘅席位，我處於極度緊張嘅戰鬥狀態。」對賽果略帶不滿的Yuki，被問到「會唔會覺得Kris有啲蠢」時，她出口護Kris：「蠢係蠢，但有啲cute。」

Yuki在「三角枱約會」中獎勵環節「甜品時間」，已擺明對Kris芳心大許！當堪輿學家雲文子指Kris過往曾受情傷、滿身傷痕時，Yuki即主動問道：「我可以做啲咩？可能令佢唔好咁唔開心？」當時雲文子直指Yuki是Kris的太陽！

之後Yuki和Kris甜蜜獨處期間，即再主動安慰Kris：「每個人總會有啲傷痕，大家就可以療癒大家。我好想為你打氣，我明有啲遺憾，但前面仲有好多花花世界，我覺得你會好好。」說畢，更邊拿出「心動頸鏈二號」為Kris戴上、邊說：「希望可以守護你！」

最終5組成績排名由高至低如下：葉蒨文組、李芷晴組、關嘉敏組、羅毓儀組及梁敏巧組。出奇不意地選了吊帶喱士睡衣的Carman，對於姜卓文（細John）及黃家俊Matthew不是包尾收場，竟大為感動：「好勁呀！點解嘅？」、「我覺得我一定輸硬呀，因為我估佢哋都係覺得我會著Oversize波衫瞓。」

對於Carman的睡衣之選，細John讚不絕口：「嗰吓我都心諗，嘩，你都carry得幾好！」在遊戲中表現如大男孩投入的細John，還真情剖白自己在愛情中是慢熱型：「加上本身Carman同Matthew比較close啲，我入呢個camp時，我係好希望搵番自己嚟到呢個節目嘅目的。」

（即時娛樂）