《晴朗》助理蔓兒被炒即日離職　「睇到兩張支票就喊唔出」

效力商業電台7年的蔓兒，主力當《在晴朗的一天出發》節目助理，間中會客串主持節目。昨日（6月30日）她在社交平台宣佈失業，透露上星期五（6月27日）被解僱並即日離職，雖然有百般感受，但由於「最緊要靚」，於是立即回家換衫，「順便攞個紅白藍膠袋返公司執嘢」。蔓兒笑言：「俾人炒好似應該要唔開心，但睇到兩張支票就喊唔出」。

蔓兒在社交平台宣佈寫道：「蔓兒失業了！上星期五原以為又係尋常嘅工作天，結果變咗last day～被通知嘅一刻心入邊有好多唔同嘅想法同感受湧現，但最強烈嘅一個想法就係『今日套衫唔夠靚！』失業唔緊要，最緊要靚！於是就返屋企換套衫，順便攞個紅白藍膠袋返公司執嘢~ 一邊執枱一邊睇返自己哪創作，諗返呢七年多以來晴朗大大小小嘅活動、慶祝生日企劃、903籃球賽、Sis私服服、九零三八………自己都真係學咗好多嘢、做咗好多嘢、成長咗好多！（同埋都老咗好多！）」

蔓兒直言「係時候轉換一下新嘅環境」，她寫道：「感謝呢度令我遇見唔同嘅人同事！人嘅記憶體有限，我只會記得好人好事。開心喺last day可以同大家一齊食飯！雖然啲男仔唔會講啲咩關懷嘅說話，但都feel到佢哋係關心我嘅（應該），好嘅就話幫我搵工，衰嘅就嗌飯嗌七個餸，食七咁食，睇嚟真係好想送我一程！笑死！七年，要學嘅嘢學咗，做到嘅嘢都做咗，每日循環做同樣嘅事情有時都會諗究竟幾時先完。所以其實都知係時候轉換一下新嘅環境，不過自己都係有d迷惘同懶懶閒。所以而家咁樣都好嘅，俾啲時間同錢錢我休息吓做吓gym去吓日本。」

最後蔓兒笑言，睇到兩張支票就喊唔出：「宇宙對我好好，相信佢係用最好嘅方法帶我去一個更好嘅地方，尋找更好嘅自己。（事出突然，同唔到晴朗團隊合照，遲啲有機會補返掛!）#其實俾人炒好似應該要唔開心 #但睇到兩張支票就喊唔出 #歡迎用錢錢撻我 #失業KOL」