娛圈單打︱捉到鹿要識脫角　搵番本地薑冇錯

TVB都好耐冇拍武俠劇咯，鬼咩，投資大，取景又唔容易，本地市場咁細，無謂咁大風險啦。之不過，多咗內地呢條大水喉就唔同講法。呢，TVB日前喺廣州舉行發布會，宣布同騰訊等多個內地單位合作，翻拍金庸名著《笑傲江湖》。網民聞訊後異常興奮，紛紛加把口討論主角人選！

即係咁，1996年呂頌賢、梁藝齡版本嘅《笑傲江湖》，一直被譽為「神選角」，皆因呂頌賢予人瀟灑不羈感覺，同令狐沖不謀而合；梁藝齡做嘅任盈盈，當時曾被批為史上最醜，點知佢憑演技說服觀眾，劇集出街後，獲讚演出到位。

嗱，家陣網民亦唔執輸，喺討論區爭住發表選角意見。有網友提議由吳卓羲及朱千雪飾演男女主角，林平之由張振朗做就Fit晒喎。至於小師妹岳靈珊，同埋小尼姑儀琳，唔少人就覺得郭柏妍兩角皆適合。喂，講到自己有份做決定咁款，都好投入啫。

由此可見，大台地位始終無法動搖，一話翻拍之嘛，一班成日話要杯葛老人台嘅網民即忘乎所以，議論紛紛。計本欄話齋，難得事隔多年再拍金庸劇，選角方面，應該盡量起用自家年輕藝人。想當年，梁朝偉做韋小寶，得22歲仔咋，已經可以獨當一面，成為經典。對比家吓啲「小生」，個個五、六十路，真係不可同日而語。

查實，近年TVB亦有播出唔少金庸武俠劇，例如《射鵰英雄傳》、《雪山飛狐》、《倚天屠龍記》，卻始終冇乜回響。梗係啦，全部係大陸劇、大陸演員，毫無港味，感覺始終差一截！所以啫，今次捉到鹿要懂得脫角，搵番香港藝人做就冇錯！

東網網站 : https://on.cc/東網Facebook專頁 : https://www.facebook.com/onccnews/