[井巷子‧米芝蓮級精緻川菜] 🌼🌿✨

人愈大，發覺對辣愈來愈上癮！

我指嘅辣不是食到噴火嘅程度，亦不是死辣嗰隻，而係辣中帶麻、鮮及香，多種層次嗰隻，咁先充分滿足到我！🤤🌶️

近來，同幾位朋友去食米芝蓮食府鋒膳旗下嘅精緻川菜館「井巷子」，試下店家招牌嘅九道菜餚，果真味道無得輸，非常想推薦比大家！

\前菜/

✦ 麻辣鮑魚手撕雞 🍴4/5

一睇前菜已覺得好有睇頭，麻辣鮑魚手撕雞

用咗南非孔雀鮑及三黃雞雞絲，中間加咗黑醋及辣椒粉，鮑片煙韌，手撕雞鮮嫩，非常惹味！

✦ 白胡椒山藥雪蓮子班骨湯 🍴4.5/5

食完較油膩嘅乳鴿，店家貼心配上白胡椒湯，清口腔同時喚醒味蕾。呢款湯入面有山藥及雪蓮子，清潤得嚟帶有濃濃嘅胡椒辛口感，非常暖胃。

✦ 麻婆嫩豆腐伴炸饅頭 🍴4/5

我幾滿意呢度嘅麻婆嫩豆腐伴炸饅頭，醬汁唔太辣，豆腐好滑溜，炸饅頭外皮乾身脆口，非常邪惡！略嫌炸饅頭數量不夠，感覺一人分2粒就無咗。😂

✦ 麻辣蒜香小龍蝦麵 🍴4/5

份量非常巨大嘅小龍蝦麵！整兜都都舖滿小龍蝦（目測有3-50隻），連同行肥肥大食怪友人都覺得誇張！活小龍蝦都用左西班牙金星啤酒、泡椒汁浸透，超入味，邊食邊剝殼食，係有點麻煩，但食晒成盤好滿足！此外，我超愛湯底中嘅手工風乾麵，入口好彈牙，好有咬口！

✦ 脆皮芽台乳鴿 🍴4/5

至於脆皮芽台乳鴿，外脆內嫩，帶有淡淡酒香，濃郁嘅油脂香，令人一試難忘！

✦ 川辣生炒羊肉鬆拌荷葉餅

由於個人唔食羊，所以都係同行朋友食，無法評價分數。不過，菜式上枱前，店家好講究咁附上一張卡仔，仲介紹埋正確嘅食法同次序，我覺得勁貼心！將荷葉餅放上炸鍋巴，再配搭英國乾熟成羊肉鬆、紫洋蔥、蔥段，夾埋一齊食，個個都讚好惹味，羊肉鹹香味重但唔會太膩。

✦ 重慶水煮黑白牛肉 🍴3.8/5

另一款重慶水煮黑白牛肉，上枱紅噹噹，以為實好辣，但食落又唔太辣，比較偏重麻香！牛肉有分三種，分別係騸牯牛、牛胸爽及牛柳心，騸牯牛及牛柳心深色，牛胸爽較淺色，故名為黑白牛，個人覺得前者2款牛一嫩一爽，後者則食落似花膠，口感豐富！此外，好鍾意湯底有薯粉、秋葵、青瓜、大豆芽菜，每樣都吸收哂醬汁精華，食上去勁惹味滿足！