《明日戰記》再破紀錄做亞洲電影票房冠軍！張家輝首度謝票：我係天幕

《明日戰記》謝票場繼續，今日輪到張家輝聯同胡子彤、吳肇軒和羅浩銘一起到尖沙咀謝票，眾人現場宣佈《明日戰記》票房衝破6,801萬，超越韓片《屍殺列車》成為香港電影史上最高票房亞洲電影。其中張家輝首度謝票，一出場就以戲中金句「我就係天幕」作自我介紹，全場觀眾報以熱烈掌聲。

《明日戰記》日前打破《寒戰II》的票房記錄，成為香港史上最賣座的華語電影，今日終於輪到在劇中主演「天幕」的張家輝首次參與謝票活動，他出場高呼「大家好，我係天幕」，呼應戲中其角色的金句「我就係天幕，天幕就係我」。

謝票期間有送禮物的環節，張家輝問現場觀眾「我是誰」，有觀眾大叫「化骨龍」，張家輝笑說：「我係天幕呀，其實套戲無張家輝，化骨龍就最好以後唔好再提啦。」其後有記者問他，化骨龍與天幕二選一，他直言：「化骨龍係好乞人憎嘅，始終係鍾意化骨龍，我成日都掛住佢，不過我又唔係好想見到佢」。

其後，正在外地工作的古天樂，打電話跟張家輝視像通話，後者立即「天幕」上身，搞笑地說：「你就係天樂？我係天幕喎！」對於票房衝破6801萬，古天樂希望達到7500、7800萬，總之愈多愈好，張家輝也說自己看了60多次，看得比剪接師還要多，他又問古天樂：「你幾時返嚟開幾套戲畀我玩？」古天樂聞言大笑，連聲道：「好呀！」