陳柏宇曼徹斯特開騷 鼓勵移英港人勿氣餒

陳柏宇到英國開騷，也寄語移居當地的港人。

現正身處英國的陳柏宇（Jason），於昨晚在曼徹斯特舉行了其巡演英國站的首場演出，全場爆滿。Jason日前一到埗後，先到當地遊覽玩樂，然後才全心投入綵排。他坦言今次開Show未有如過去般緊張：「我哋喺倫敦綵排兩日後先再落曼徹斯特，有一種好Chill嘅感覺，冇咗之前喺香港開Show嗰種緊張，輕鬆啲。」

Jason昨晚於曼徹斯特舉行了其巡演英國站的首場演出。

昨晚一開Show，Jason唱出《對得起自己》後，現場氣氛即被炒熱，Fans的叫囂聲不斷，Jason唱罷亦道：「呢度好好Feel，因為大家距離好近，突然有少少緊張，本來話唔講嘢，但一緊張又想講，我唔係好有Showmanship（表演技巧）……」此時有Fans大叫他「靚仔」，Jason即笑言：「多謝，但靚仔唔係Showmanship，係天生！（指住自己面容）呢個唔使努力㗎！」逗笑了台下觀眾。

近年英國成為了熱門移民地方，不少人在當地生活後都會遇到工作、生活、文化等不同衝擊，Jason與團隊特別將過去紅館演唱會Fight For的奮鬥精神，帶給英國Fans，並說：「離鄉別井幾時都係困難嘅事，若然有朋友嚟到英國未適應到，唔開心失落嘅話，千祈唔好氣餒，呢段唔開心、孤單日子會過，當喺度耐啲嘅時候，開始識多咗朋友，習慣呢度生活，失落感覺會慢慢消失，然後就會搵到生活喺度嘅樂趣，所以希望大家喺度嘅生活過得開心。」隨後Jason更預先向Fans拜早年，跟大家預先說句「恭喜發財」！

Jason與Fans合照。

完Show後，Jason再與Fans合照，當中有些是曾在Fans聚會中出現過的，今次在曼徹斯特重遇，Jason也份外感動，合照簽名有求必應外，亦送上祝福與擁抱，以答謝Fans一直以來的支持。明晚Jason將返回倫敦舉行英國站的最後一場演出。

重遇Fans好激動。