口臭真係一個令人好尷尬嘅問題，就算外表執得好整齊，一旦開口有異味成個形象都會大扣分。想避免口臭問題其實好簡單，只要喺飲食習慣同生活習慣有小改變，都可以幫你保持口腔清新㗎～
1. 多飲水
其中一個引致口臭嘅原因係口乾，唾液有助清潔同滋潤口腔，但當唾液不足嘅時候，死細胞就會積聚喺舌頭、牙齦，分解後會產生異味，所以大家要記得飲多啲水喇～
2. 飲用暖鹽水
鹽具備殺菌功能，可以令細菌因為細胞缺水而死亡，而且溫鹽水有助口腔消炎，帶走口中粘液嘅細菌，自然改善到口臭嘅問題。
3. 保持腸胃健康
口臭嘅成因仲有消化不良同便秘，前者會令腸道內嘅食物腐臭味湧上口腔，後者會令體內宿便同毒素未能及時排出，都係會引致口臭。建議大家食用山楂同乳酪，山楂能夠解決因為食得太多肉而引起嘅積滯；乳酪含有活性益生菌，有助腸臟消化，同樣可以解決因積滯、消化不良而引起的口臭，同時保持大便暢通，預防口臭。
4. 食用含辟味作用的食物
唔少食物都有辟味作用，例如檸檬能夠中和口腔異味，而且佢嘅酸性都有助消化，所以朝早起身都建議飲返杯檸檬水，不過如果有胃病嘅朋友就唔太適合喇。薄荷葉呢種香草都有助去除氣味，食完嘢不妨嚼幾塊；綠茶都係中和口氣好幫手，清熱得嚟又可以殺菌，能夠減少因細菌積聚而引起嘅口氣問題。
留言 0