唔只買唔到口罩！武漢肺炎殺埋身　十大最影響生活嘅事

成個新年都戴住口罩真係夠曬難忘

因爲武漢肺炎爆發，今個新年大家拜年、出街都全副武裝：有口罩戴口罩，有眼鏡戴眼鏡。覺得過年戴足咁多日口罩好麻煩？ 最慘係依家口罩缺貨，想戴都無得你戴，就嚟街都唔敢出。每次爆發大型傳染病，大家危機意識都會大大提升，亦都比平時更注意衛生，今次呢個新型冠狀病毒撞正新年假期，對各位市民日常生活有更大影響、造成更多麻煩。以下呢十樣因爲疫情造成嘅困擾，你又有無身同感受呢？

DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。

10 被逼放無薪假

本身過年放假應該都係大家好期待嘅事不過撞正肺炎爆發，政府宣布學校假期同埋政府部門假期都延長，希望避免人群接觸，減低感染機會。有啲公司決定延長假期，不過就要求員工自願放年假，亦都即係無薪假。其實都可以理解嘅呢個環境下，就算開工都冇乜生意，而且一出街就要帶住個口罩擔心被感染，不過員工嘅角度梗係覺得要扣大假唔合理啦。總之就公司頭痛之餘，員工又無奈。

image source:Youtube/ BBC News 中文

9 有病都冇醫生可以睇

成日話「有病就要睇醫生」，但依家就算想睇都未必有醫生可以睇。前排屯門醫院接收一名武漢肺炎病人，不過就因為醫療失誤，冇將佢安排喺負壓病房導致12人需要隔離。醫院呢啲長期咁多病菌嘅地方，喺呢啲緊張嘅時期大家就更加敬而遠之。加上政府遲遲唔封關，仲宣布非本地人都可以免費享用醫療服務，有醫護人員擔心導致醫療系統超出負荷，唔少前線亦都反映政府無提供根本冇足夠嘅裝物資比佢哋進行醫護工作，所以延伸出醫護罷工嘅行動，希望得到政府正面回應。

image source:Youtube/ RTHK 香港電台

8 不能親密接觸

大時大節，一大班親朋戚友聚首一堂，本身應該好熱鬧，不過大家坐埋一檯，其中有個人打個乞嗤，都咪話唔驚。本身食團年飯一家人可能都未必會使用公筷，但相信今個新年唔少人都會要求使用公筷避免交叉感染。目前結果顯示病毒主要靠飛沫傳染，專家都不斷提醒大家要勤洗手，減低細菌傳播機會，畢竟你唔知人哋隻手摸過啲乜嘢、有冇接觸過病毒，所以大家都避免同人接觸，都係果句：避得就避啦。

image source:YouTube/ TVB (official)

7 商店、政府機構縮短營業時間

武漢肺炎疫情暫時仲未可以控制得到，專家呼籲盡量避免出街同人群接觸，而且口罩咁難買真係慳得一個得一個。呢個時勢，無論食肆定普通鋪頭生意都一定大大受到打擊，唔少公司都宣佈縮短營業時間，反正冇乜生意不如早啲比員工返屋企，費事搞到人心惶惶咁返工啦。就連八大銀行都有唔少分行暫停營業，郵局亦都會改為隔日派信，提供有限度嘅服務，為求將今次新型冠狀病毒擴散嘅機會盡量減低

image source:Youtube/ 蘋果動新聞 HK Apple Daily

6 搭交通工具時人心惶惶

香港人口密度咁高，交通工具幾時都係人迫人，繁忙時段基本上好難避免同其他乘客有身體接觸，而家風頭火勢大家都好警惕，唔少人都表示搭搭下車有人咳兩聲嘅話，自己都會即刻彈開。打一兩個乞嗤可以全部嘅病毒同埋飛沒接觸嘅範圍其實好廣，如果係同一個車廂內可以話係避無可避，戴口罩係最基本嘅配備，萬一見到有呢啲打乞嗤、咳嘅人連口罩都唔戴，真係驚到分分鐘即刻衝落車㗎。

image source:YouTube/ TVB (official)

5 出差、旅遊被迫取消

疫情大規模爆發，台灣政府一早已經宣佈禁止疫情最嚴重嘅湖北省居民，或者到過湖北省嘅人入境，後來將範圍擴大到到過廣東省人士都一樣限制入境，防止病毒喺台灣傳播。初期大部份針對中國地區嘅人禁止入境，不過近日菲律賓、意大利都禁止中國，連同港澳地區嘅人士入境。世界各地都已經有發現確診武漢肺炎嘅人士，可以話冇一個地方完全安全，亦唔知有冇病毒喺你附近，就算冇被禁止入境，大家應該都冇心情周圍玩，本身安排好去旅行或者出差都唯有取消啦。

image source:YT/有線電視 CABLE TV & 有線新聞 CABLE News

4 街都唔敢出，日日留喺屋企

依家全城緊張嘅問題，除咗係幾時封關，就一定係邊到有得買口罩啦。今時今日唔戴返個真係唔夠膽行出街，偏偏周圍都斷晒貨，就連想喺海外訂購，日本、韓國好多廠商都一早接爆單，有錢都買唔到。街又冇得出，亦都唔夠膽去餐廳食飯，唯有去超級市場掃定貨，喺屋企自己搞掂。早排超級市場連米，罐頭，都俾人搶到冇晒，睇嚟大家都已經準備好打持久戰，實行留喺屋企唔出街防疫。

image source:Youtube/新唐人亞太電視台NTDAPTV

3 學生延後開學

1月31號行政長官林鄭月娥公布多項針對武漢肺炎傳播嘅措施，其中一樣包括中小學同幼稚園嘅假期延長到3月2號。學生可以放個長假應該都好開心，不過家長就頭痛啦，除咗部份停工嘅公司之外，大部份打工仔都正式返工，學校停課，小朋友唔使返學，家長都要返工嘅話就冇人可以照顧小朋友，又要另外安排人幫手托管。不過學校呢啲高風險，容易大規模傳播病毒嘅地方，的確好值得特別關注，咁多位家長辛苦晒喇。

image source:Youtube/ 有線電視 CABLE TV & 有線新聞 CABLE News

2 公開活動取消、公共場合關閉

而家大家都減少聚會，避免去一啲人多擠迫嘅高危地方，好多平時逼滿人嘅地方例如迪士尼同海洋公園都先後宣布暫停開放，唔少公眾活動亦都表示延期。好多歌手演唱會亦同樣受到影響，因為疫情持續蔓延，華仔劉德華上個月宣佈取消12場香港嘅演唱會，莫文蔚香港演唱會、蔡依林喺中國地區嘅多場演唱會全部都宣佈延期。原本滿心期待嘅fans一定都好失望，不過為咗大家安全着想，都只可以默默接受，希望疫情控制盡快好轉，早日宣布延期嘅日子。

image source:Youtube/ 有線電視 CABLE TV & 有線新聞 CABLE News

1 消毒抗菌用品搶都搶唔到

口罩呢啲即棄性用品買唔到，就連消毒酒精、消毒濕紙巾、消毒啫喱等相關抗菌用品，而家都唔係咁易搵到，無論超級市場、藥房，便利店都俾人搜刮一空。任何消毒殺菌嘅產品，連空氣清新機，大家都買咗先算，有乜用乜。冇口罩都話可以盡量唔出街，但消毒屋企就無得唔做。就算新年前大掃除完，而家都要記得繼續保持屋企環境清潔，定期消毒，降低細菌生存機會。睇嚟以後大家都要未雨綢繆，長期準備好消毒產品喺屋企，先唔會好似而家咁臨時臨急，想用但係已經乜都買唔到。

image source:Youtube / BBC News 中文

【香港網路溫度計調查結果之圖文，未經授權請勿轉載、改寫】

分析說明：

本研究資料由《KEYPO大數據關鍵引擎》提供，分析時間範圍為2020年01月05日至2020年02月03日。

網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『武漢肺炎對生活的影響』相關文本進行分析，並根據網友就該議題之討論，作為本分析依據。

本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。