屯門娜娜報稱36歲成焦點　人氣極高原來係照騙

無綫歌唱真人騷《中年好聲音》尋日（4日）進行面試，當中跳大媽舞出名嘅「屯門娜娜」董幸兒一現身，即騎劫成個interview成全場焦點。「屯門娜娜」因為2019年流出一段屯門公園表演大媽歌舞團片，令Happy伯即場下跪熱舞為女神喝采而成為新聞人物，不過因為風頭太盛、聲浪擾民而遭「掃場」敗走，大家冇得再現場朝聖而轉為喪Loop佢社交網，估唔到今次娜娜肯走出濾鏡現真身！

娜娜於節目中報稱自己目前無業，現年36歲，但佢月前曾轉戰做直播主，更喺社交網晒出出入高檔場所同周身名牌嘅靚相，生活無憂。而佢亦一度孖朋友轉場走入廟街表演，雖然未見Happy伯身影，但仍然有唔少上晒年紀嘅伯伯捧場，人氣未減。如今娜娜再現，網上亦掀起激烈討論，明顯人氣仲Keep到，不過就有唔少人質疑佢同自拍個樣爭太遠，有照騙之嫌，到時節目出街後佢係好評定差評就見仁見智喇。

東網網站 : https://on.cc/東網Facebook專頁 : https://www.facebook.com/onccnews/