【獨媒報導】港隊周六凌晨在亞洲盃分組賽僅以一球不敵伊朗，雖然錄得兩連敗，但表現絕不失禮。足總安排球隊下午於下榻酒店舉行球迷見面會，約60名球迷出席。主教練安達臣及一眾球員向球迷致謝，並與球迷打成一片。安達臣坦言：「我知做港隊球迷唔易，因為我哋唔係成日贏，球迷都想支持一隊贏波嘅球隊，可以一齊慶祝，但即使我哋唔係成日贏波，你哋都仍然撐我哋，係真球迷，真係好多謝你哋。」
《獨媒》記者麥馬高、周頌謙 卡塔爾直擊
香港隊自1968年後，相隔56年後再打入亞洲盃決賽周，大批球迷相繼追隨球隊到卡塔爾擔任球隊「第十二人」，頭場對阿聯酋有近百人入場為港隊吶喊，昨晚對伊朗一戰更有約400名球迷入場支持港隊。
足總今日在港隊職球員下榻的酒店舉辦球迷見面會，並安排茶點招待，約60名球迷在網上登記後出席。主教練安達臣及多名港隊成員均有出席，包括葉鴻輝、勞烈斯、周緣德、陳肇鈞、陳晉樂、黃威、胡晉銘、安永佳、謝家榮、孫銘謙、謝家強、守門員教練范俊業等人。
安達臣：港隊不常贏波，感謝球迷照撐
在見面會上，安達臣及一眾球員與球迷打成一片，一齊拍攝大合照，對球迷要求自拍及簽名也絕不「say no」。安達臣更有感而發向球迷表示：「我知做港隊球迷唔易，因為我哋唔係成日贏，球迷都想支持一隊贏波嘅球隊，可以一齊慶祝，但即使我哋唔係成日贏波，你哋都仍然撐我哋，係真球迷，真係好多謝你哋。」
他之後向記者表示很喜歡此類與球迷交流的活動，又稱讚香港的球迷很自律才可安排到見面會：「我哋仲未贏到波，唔可以一齊慶祝住，我哋只能透過咁樣見面感謝佢哋嘅付出。」
陳肇鈞：想球迷帶好回憶回家
在對阿聯酋一仗中為港隊攻入一球的陳肇鈞就表示，希望透過見面會對球迷「有啲表示」：「我哋 feel到佢哋嘅存在，知道佢哋好辛苦咁嚟，好多謝佢哋。」他指從沒有想過有近400名球迷會來到現場撐港隊：「feel 到第十二人原來係咁有力量喺度，想俾個最好交代佢哋，行到幾遠都好，希望帶到個好好回憶返香港。」
Philip亦坦言十分樂意與球迷交流，強調球迷亦是賽事中的主角，更指得悉部份球迷是從歐美遠道而來：「我想話俾佢哋聽佢哋付出唔係剩係喺球場見到我哋，大家係可以有互動。」他續稱活動氣氛很好：「我哋未攞到一分，但都踢得幾場好波，大家都冇諗我哋仲係零分，佢哋都一面倒支持，好多謝對我哋嘅愛係無條件。」
資深球迷見艾華頓、祖連奴住港隊波衫感觸落淚
資深球迷 Carmen支持本地足球多年，曾為地區球隊元朗的狂熱支持者，港隊兩名入籍兵艾華頓與祖連奴來港初期亦曾為該會效力。她見證二人由外援身份，到決定留港七年入籍，再到今天披起港隊球衣時，不禁感觸落淚：「當年喺元朗我哋影咗一張相，我同佢哋講『你一定要留喺香港攞到特區護照，我哋再影一張著住港隊波衫嘅相』，宜家係做到啦！」
Carmen對《獨媒》表示，二人初來港時，曾協助幫手處理證件等細節，之後由球員球迷關係到變成朋友。她坦言，外援球員要放棄原本國籍到一個陌生地方落地生根並不容易：「要決定嚟香港，離鄉別井……從來都係外援艱難過本地球員，佢哋今時今日攞到特區護照，放棄咗巴西籍都係唔容易嘅決定。」
作為港隊賽事常客的Carmen，今次更會留在卡塔爾兩星期，〗全程見證港足重返亞洲盃決賽周歷史。她認為香港隊出戰亞洲盃並非易事，並期望祖連奴可復出在最後一場對巴勒斯坦的「生死戰」亮相，為前線爭添火力。
《獨媒》亞洲盃採訪開支由逾130名熱心讀者贊助，Footstop 買波飛 贊助
留言 0