久聞「屯門牛體育會」呢個名字如此玩味嘅跑會，一直以為只係一班屯門牛組成嘅街坊跑團，深入認識後方發現呢班屯門牛夠癲夠好玩之餘，有組織有理念且行動力極強。
「屯門牛體育會」由 Gobby 同鄧 Sir 呢兩位屯門街坊所創立，只因無聊地想約同道中人出嚟跑吓步。到底因為屯門街坊無聊定佢哋特別好動 ? 不得而知，但不足一年已於社交平台集結咗接近成萬人，除屯門友外更有嚟自各區街坊！呢個體育會現已不止跑會咁簡單，已擴展至越野跑、籃球、足球、保齡球、兵乓球，羽毛球，甚至水上活動。更讓人拜服嘅係為杜絕炒場歪風，會內更有專人把關，為波友晨早排隊 book 場打波，愛運動愛街坊愛屯門至此，「屯門牛體育會」呢個朵已不足形容其厲害，「屯門體育協會」才配 !
全港十九區到底還有否類似嘅民間自發體育會呢 ? 無從跟進，但動員力強如「屯門牛體育會」兼如此展現出以運動把街坊聯繫起嚟，實在難能可貴。
眾所周知，現今屋苑文化早已取代七八十年代嘅屋村文化，往日家家戶戶守望相助，睦鄰關係深厚，如今，自恃高質且強調活動空間嘅大型私人屋苑反而令鄰里關係變得疏離淡薄，連隔離屋貴姓都未必知。難得有心人以跑步 / 運動再次激活街坊鄰里關係，且盡心盡力建立出極具系統性嘅架構，難得。其有心程度不止相約一班人出嚟郁吓，還要安排教練義教，網球教練、藍球教練、跑步教練，聽講最近正物色緊 roller 教練，諗到嘅有諗唔到嘅都有。全部街坊自發，一呼百應，呢份滲透式嘅社區大愛，似乎已絕跡於現今各大屋苑多年了。
最初以跑連心嘅呢班屯門牛，今時今日甚至已發展至於頻道上討論點樣教仔、生活瑣事以至區內大小事。運動從來可以唔止係運動，更能於社區入面產生一種人際間互助互愛關係，Gobby 同鄧 Sir 當初單憑社交媒體上嘅一個 post 而發展至如今嘅「屯門牛體育會」，委實唔簡單！
誠然，口號式嘅「全民運動」聽咗好多年，甚麼盛事之都，運動經濟……學術味過濃，讀得書少，唔識 ! 但真正出心出力落手落腳去實踐嘅，「屯門牛體育會」完全係貼地式嘅教材級別示範作，要成就一個有價值有睇頭有吸引力嘅運動會，怎能缺少一班真正懂運動愛運動嘅人 ? 齋吹唔做，不如收舖 !
The post 尋找跑會的故事 #27 | 屯門牛體育會 – 真．社區全民運動 appeared first on Fitz 運動平台.
留言 0