人臉識別技術應用嘅範圍越嚟越廣泛，隨住2025年大阪萬國博覽會即將來臨，大阪地下鐵推出人臉識別入閘系統，由12月10日起進行為期10個月嘅試驗，大阪地鐵營運商大阪市高速電氣軌道公司表示冀2024年內於大阪府內133個車站全面使用。呢次係日本國內首次使用人臉識別系統入閘機，務求打造未來「無票化」嘅搭車體驗。
現時日本民眾搭鐵路主要都係用車票，但未來只要事前登錄臉部相片，便可快速通過入閘機，省咗搵車票、驗票嘅時間。喺10個月嘅試驗期內，大阪地下鐵將以公司員工為對象進行實驗，人數約1200人，實驗直至2020年9月30日結束。一般乘客暫時就冇機會試用啦~
根據人臉識別系統，乘客通過地鐵入閘機嘅時候， 入閘機上方設置嘅相機就會對乘客臉部拍攝，將資料送到位於總公司嘅伺服器。如果乘客人臉同預先登錄嘅相片吻合，閘機門就會打開。但如果戴咗口罩、太陽眼鏡或者針織帽遮蓋面部等情況，都會視為辨認失敗，咁就唔可以通過閘機。新系統對於輪椅使用者同推嬰兒車等等唔方便摷車票嘅乘客而言，的確方便好多。
大阪地下鐵日前展示咗使用設置於長堀鶴見綠地線圓頂球場前千代崎站嘅檢票閘機，員工試用人臉辨識系統嘅情況。
測試系統除咗初步設置喺長堀鶴見綠地線嘅巨蛋前千代崎站外，未來亦將會喺大國町站、動物園前站同森之宮站設置一至兩部人臉識別機。測試嘅目的係為咗忽較唔同製造公司嘅人臉識別機嘅識別速度同準確性，並持續提升精確度。
人臉辨識系統雖然方便，但其私隱問題及風險亦值得注意。台灣交通部鐵道局喺台鐵豐原車站試辦嘅「智慧型影像監控系統」仍測試中，其中嘅人臉辨識功能，日前引起侵犯隱私權爭議後，已決定取消。
有專家對人臉識別系統嘅可能衍生風險表示憂慮，日本國立情報學研究所副所長越前功表示，人臉資訊同相關嘅個人資訊一旦外流，第三者就可以獲取所有資訊，而呢啲資訊同密碼唔同，係無得變更嘅。民眾必須仔細確認資料如何被使用以及使用目的等；自己提供嘅個人資訊同獲得嘅便利性成唔成正比，用唔用人臉辨識系統，必須由自己嚟判斷。
大阪地鐵則回應，指會嚴格管理同監視位於總公司嘅伺服器，但就未具體說明同解釋其管理方式。 雖然 2024 年人臉辨識系統上線後，仲仍然可以使用電子票同車票，但大阪地下鐵未來希望全部只用人臉辨識嚟管理乘客，打造一個「無票化」嘅乘車環境。
另外，東日本鐵路公司（JR東日本）正討論使用智能手機應用軟件（APP），推出無需IC卡觸碰就能通過嘅檢票閘機。
留言 0