雖然未到聖誕，但相信各位姊妹已經開始去緊party，與不同朋友慶祝佳節。要帶出聖誕氣氛，當然要化個靚妝，不過無論出門口化到個妝幾完美，隔一陣總會開始脫妝，特別係隨著說話、咀嚼等動作，唇妝出問題的情況尤其嚴重。為了令各位時刻都可以保持靚靚，CHOCO今次就分享幾個延長唇色壽命的方法，讓大家擺脫尷尬！
潤唇膏愈厚愈好？
塗有色唇膏前先用潤唇膏（Lip balm）打底是常識吧，然而好多人會誤會塗得愈厚愈滋潤愈好，其實這個做法絕對錯誤，過厚的護唇塗層其實會阻礙上色。想確保咀仔滋潤？最好在上妝前十分鐘就塗上潤唇膏，而上有色唇膏前，要先用紙巾按摩咀唇，幫助滲透之餘亦可以帶走多餘的潤唇膏。
到真正的上色技巧，本小姐就分開唇膏（Lipstick）及唇釉（Lip stain）、染唇液（Lip Tint）來介紹。
利用唇線筆、胭脂延長唇膏壽命
為了打造滋潤或啞身質感，普遍唇膏的設計並不持久，姊妹們適宜先用近似色的唇線筆打底，它會有膠紙般的效果，幫手抓住後上的唇膏顏色。
另外，坊間不少人會建議畫唇後，用碎粉隔著紙巾定妝再補色，不過此方法其實並不適合本身咀唇較乾的姊妹，因為有可能會突顯了唇紋。想有同樣效果可以試試化妝袋必有的胭脂，直接用手取少量並輕輕印上唇即可。
先「卸妝」讓唇釉、染唇液更持久
用得唇釉、染唇液當然係貪其持久力，不過用過都知顏色其實會走，明明出門口塗得好靚，慢慢卻會甩到似淡妝。為了令它們發揮到最大效果，塗的時候可以先塗得比理想顏色誇張，待乾後以卸妝水抹走，留下真的有染色功效的一層，方便自己判斷理想顏色。如果嫌太淺色，可以再次塗上產品、抹走，重覆動作至滿意為止，最後以潤唇膏滋潤一下即可。
留言 0