外星人出哂，一定有古怪 | Janet Ng、聰sir和Rex從亞錦賽談建香港越野跑的拱門

亞錦賽這24位香港越野跑代表，30秒內你能夠說出12位以上的名字攞B，18位以上攞A，22位以上的你會被DQ，你一定係大會職員/家屬

呢個標題黨源於10月在韓國蔚州舉行的首屆亞太區越野錦標賽 (亞錦賽APTRC)，由中國香港越野跑步總會 (TRAHK) 負責統籌香港代表，派出史上最龐大的38名越野跑手，參加長、短距離及U23組別，而且獲理想成績，包括 U23 男子由 Rex 羅樂賢勇奪冠軍，林天晴女子季軍，港隊整體團體第三，女子長距離團體亞軍，敏怡和 Angie 都跑進前10。這次港隊出征，眾口皆 like。

港隊團體第三，領隊小強代表領獎，配襯龐大的港隊跑手，這才是真正的香港盛事

港隊女子長距離團體亞軍，又年青又美麗又跑得快，得唔得㗎

但鏡頭一轉回到去年6月 (所以不用加雪花扮陳年舊片)，在奧地利舉行的世界山徑越野跑錦標賽，香港僅派三男一女代表 (阿歹、鷹鷹、浩聰、敏怡) 參加，只有4名成員的港隊是自動放棄競逐團體賽 (計算6項賽事的成績)。長居香港的澳洲籍跑手 John Ellis 表示失望和不合理 (make no sense)，他說澳洲的越野跑成績不及香港，也派出32名選手參賽，越野跑沒有香港般盛行的台灣有18名代表。

2023年只派4位港隊代表出戰世錦賽，原因有待東張西望找出來

負責委派代表的田總，被批評選拔過程不透明，及沒有讓更多本土出色的越野跑手吸收大賽經驗，為什麼是4位? 香港真的只有一位女跑手合乎水平嗎? 在剛過去的毅行，數千盞頭燈在冷雨中點亮了100公里的山徑，希望某總會的執事能 feel 到本土越野跑的溫度。

為此中國香港越野跑步總會對田總表示極之失望，有過一輪火花，山界一地花生。會長 Janet (吳秀華) 認為對香港越野跑發展極為不利，也辜負了香港越野跑手多年的努力。她說若因經費問題的話，TRAHK 可以支援，這是有聲音的文字。

為什麼兩項同樣是以港隊名義出戰的陣容可以相差天與地。除了每年一度的香港山路錦標賽，在山徑見不到田總的絲帶飄揚，與越野跑的關係疏過表舅父個外甥女，不明白由田總主導委派越野跑代表的原因? 其實香港的越野跑究竟係邊個話事? 本土越野跑的拱門由誰建立? 香港在亞洲係一哥定嘍囉?

今次請來負責遴選亞錦賽港隊代表的 Janet 和聰sir，追加新鮮熱辣 U23 冠軍 Rex，除了解釋香港越野跑的主導權和機制，也吹吹在亞洲越野跑的光明頂，香港是少林、武當? 或只是華山、崆峒? 在政府零支援下可否打造出幾個少年張無忌?

訪問在九龍灣運動場做，傾完發覺唔記得影相，幸他們跟著有場直播訪談在附近，於是踩去人地個場補影。記得好似有句話乜嘢只要自己唔介意……，下一句係乜呢?

浩聰在學界尋找無忌

浩聰大大小小的賽事都玩過，近年他在地球完成多項外星任務，包括 TOR330 巨人之旅、500公里環港挑戰、用了14日完成700K法國著名的 GR5 山徑 (攀升34889米)等，當跑的路已經跑盡，連唔當跑的都走埋，what next?

「早年我對自己的定位是越野跑運動員，而家我嘅任務係傳承，想將我有嘅知識傳俾青少年，佢哋進步快。所以成立 youth team 由8-18歲。青少年消費模式唔同成年人，佢哋唔會攞錢去報興趣班，更加唔會報比賽。所以要推入學校，要唔收學生費用。」

年紀最細的8歲隊員，2枝水樽已佔了半個身體，架副超係帽頂，cute 爆

浩聰個朵山界無人不識，但學界只是位任何人:「點敲學校道門?」

「學界運動有16項，田徑是大項，另一項是越野跑 cross country，但都是佔十六份之一。而學術、藝術、體育的成績構成學校的競爭力，亦即係 banding。校長、老師同家長會重視任何能提高 banding 的途徑。所以會 buy 提升學界越野跑的訓練班。」

「開始時我哋會以中長距離路跑為主，然後轉為3.8至5.5公里越野跑上落坡訓練。跟住會招募有興趣的青少年去體驗一下我哋眼中嘅越野跑 trail running，舉辦短途2.4公里100米攀升嘅「高峰對決」比賽，已經去到第三屆。」

就算骨格唔精奇，只要能夠刻苦耐勞，唔怕上斜路，就踢佢入會

「由於亞錦賽係根據 ITRA 分數遴選，所以我哋會搞幾場可以令佢哋開到 ITRA account 攞到分數嘅比賽。我問過 ITRA 最短認可賽事嘅距離，原來是 5EP。將會舉辦的賽事特色是短、平 (青少年半價)、近 (地鐵站附近)。同時可供 junior 同 senior 同場競技的。」

「學校嘅市場同反應如何?」
「全港有五百間中學，學界越野賽呢個項目有25000個名額，只有150間有校隊，上年只有6800人報名，仲有好大增長空間。我哋幫手建立校隊，第一年試行有3間中學，今年有14間，再多啲我哋暫時都做唔晒，因為要培訓教練，Rex 都有幫手教。」

浩聰唔單止跑山快，仲係 marketing 高手，能夠從天空看事情，有視野和策略；又可以落番地面執行，個腦同對腳都係轉數高，無得跟。

Janet細說越野跑的操盤者

Janet 於2021年由 ITRA (International Trail Running Association, 2013) 的執行董事及財務主管，接任退下來的 Bob Crowley 當上主席，成為全球規模最大越野跑組織的總陀，是首位女性主席。在港她是中國香港越野跑步總會 (TRAHK) 會長，HK100 (World Trail Majors 每年首個分站賽事) 的創辦人和總監。由本土至國際，都佔據越野跑的核心權力位置和擔起重量級推手。

Janet是HK100的創辦人和總監，可以揸支咪在幕前面對群眾，更是能落場砌的運動員，真正的三項鐵女人 Triathlady

Janet 百分百 made in HK，多棲運動員，除了與丈夫 Steve Brammar 愛好越野跑之外，亦是田徑和潛水健兒。但 Janet 不是皮膚黝黑的打女款，她長髮飄揚，用溫文的聲調說出有力的理據，娓娓道來，去到就算唔聽內容都會覺得道理站在她那一邊的境界。

甜美笑容的背後，是份越野跑化不開的濃情，這恩愛的一對照亮了山界

我當然冇咁膚淺，要扮東張找出真相:「點解越野跑世錦賽同亞錦賽由唔同組織委派代表? 田總同香港越野跑步總會有乜嘢唔同嘅角色?」好少問得咁正路。

「要講少少背景，ITRA 由一班大型賽事嘅 race organizers 同越野跑 stake holders 係2013年在瑞士成立，食住 trail running 嘅浪，好快成為最具規模嘅國際越野跑組織，在山界有廣泛的認受性和網絡。越野跑突然 boom一聲引發全球好多人參與，好多 brand 資助，好多組織搞比賽。呢股熱浪同時吸引了世界田聯 (World Athletics) 眼球，希望把越野跑納入版圖。」

「但 World Athletics 主要搞 in stadium 比賽，最遠都只係馬拉松，越野世錦賽最初係由屬下嘅「國際超級馬拉松跑者協會」International Association of Ultrarunners IAU (例如搞 24 小時的倉鼠跑) 籌辦，佢哋唔係咁認識 trail running，於是 partner ITRA 攞 technical advice, 之後 World Athletics 屬下專注mountain running 的『世界山地跑步協會』World Mountain Running Association WMRA 加盟，三方一起舉辦世界越野錦標賽 WMTRC (每兩年一屆，2025年9月將於西班牙舉行)。因為 ITRA 設有 ITRA index，選派代表有參考價值。」

「World Athletics 嘅 governing structure 由各地 National Federation 組成，在香港嘅 National Federation 就是田總，所以世錦賽授權田總負責和委派代表，呢個係歷史嘅原因。」

浩聰舉手發問:「咁定向世錦賽係唔係under World Athletics?」
「唔係，定向是分開的，有佢哋自己嘅獨立組織。」
「咁 Trail running 有冇機會唔 under World Athletics?」浩聰追問。

「World Athletics 始終係一個大組織，好多重要機制已經設立左，例如 anti-doping (藥禁) 同 sustainability 佢哋都有團隊去做，所以 World Athletics 嘅參與可以加強運動嘅成長和認可性。但我十分認同田徑或馬拉松，同搞100公里山賽嘅分別實在太大。」等於男仕眼中的女神同大嬸絕不可混為一談，呢點要認真。

「好多地方嘅田總都覺得自己不太認識越野跑，交左俾當地的 trail running 組織負責。中國國家體育總局都係將 trail running 放係 Chinese Mountaineering Association CMA 下面，不過香港仍然由田總主導。」

遴選機制 – 一試定生死 vs 排ITRA分

「ITRA 鑒於亞太區唔似歐洲咁樣，已經有每兩年一次嘅歐洲錦標賽，所以決定牽頭去舉辦，亦得到 World Athletics 嘅支持。呢次亞錦賽大部份都係由當地嘅 trail running association 去負責，香港就由香港越野跑步總會統籌，我哋就用 ITRA 分數去決定人選，呢個比較 objective，但有些地方都係個別去挑選邀請。」終於由廚師負責煮飯，花王種花，馬伕拉馬。

亞錦賽CP港隊自設檔口，有好多唔洗急最緊要快的片段

「但係純粹靠 ITRA 分數去遴選，會唔會忽略左近期狀態因素?」
聰sir解釋:「ITRA index 係計最近3年5場最高積分嘅賽事分數，推算法是愈近期的賽事會佔分愈高，愈久遠的分數會遞減。」

訪問翌日Janet pm我，說當日忘了送亞錦賽的紀念頭巾給我。兩日後便收到了，感激。One Trail, One Heart，有山徑就有愛

「今次亞錦賽港隊派出38人龐大陣容，38呢個數字點得返嚟?」
「我諗過如果好似田總搞一試定生死的選拔賽會有些問題，第一未必個個都有時間係那個檔期參加或操練，第二事前亦冇公佈選拔幾多位代表同準則，引來話柄。世錦賽有長短不同賽道，為什麼只集中在50K嘅賽道挑選代表?」

「今次由香港越野跑步總會負責，搵我做召集人，我唔想破壞招牌，所以十分小心遴選制度。亞錦賽可以由 trail running 組織委派，亦可以個別報名，因為有啲地區冇總會。所以我哋定左個報名 deadline，跟 ITRA index 個 list 逐個打電話問佢哋會唔會玩，否則由下一位補上。果幾日我打左60幾個電話。最終填滿了大會嘅40個名額上限 (20男20女，參加長、短距離和U23三個組別)。但過了報名deadline後有兩位因事臨時退出，所以最後38位成行。最重要係第一屆定了個遊戲規則。」浩聰話唔想俾人覺得凡係乜乜總會去做，總會有問題，所以步步為營。

沒有政府的支援下，能夠有38位香港越野跑手參加，得來不易

可能賽事只有短暫的籌備時間，用 ITRA 分數選取代表的機制不能及早公佈，有興趣者未有足夠時間和機會去爭取較高排名，不過希望定了機制後，日後可以讓更多跑手為此訂立長期目標爭取代表香港出席。透明度和連貫性畢竟是公平的基石。

「總會是第一次負責籌辦呢個賽事，阿聰真係咪晒所有 rules，好合符規矩去做，我好 impress。」Janet 十分感激浩聰的認真和付出，我下次都會叫佢做阿聰，好似自己都勁啲咁。

浩聰也要讀出他的感謝名單:「今次我同 Angie 仔細研究過會唔會有其他做法更好，我哋唔想有鑊氣，希望第一屆能夠做好個聲譽。特別我哋有幾位 official 都好幫到手，包括領隊小強，佢係精神領袖，好有地位，講幾句說話大家都拍晒手掌。其他仲有Christine、JoJo、比比都係超級好幫手，合作無間。我哋5個人湊38個跑手，性價比好高。」這次亞錦賽的傳媒報導和山界迴響都十分正面，曝光率也高，性價比贏晒。

Super helpers，照顧38位跑手，包括數位小外星人，一定要有阿媽、阿四、茶水、外賣仔、按摩師、輔導員和訓導等角色

「大力少少唔該。」唉，helper的血淚史

「呢條路走下去，財政上你哋有冇需要尋找商業贊助?」
「有商業贊助自然好事，不過首先要有成績才可以吸引外界資金。」

「點睇香港係亞洲嘅水平如何?」
「在亞洲日本同中國仍然是一線，我覺得中國應該大力發展越野跑，這是軟實力的展現。不過日本好有潛質趕上嚟，因為佢哋跑馬的成績厲害，只要將部份跑馬的選手轉移過去越野跑，會好大威脅。越南、菲律賓、馬來西亞上得好快，因為多全職跑手。香港全職跑手寥寥可數，成年組水平是一般，女子方面較佳，短距離 (41K) Harmony林楚茹第四，長距離 (74K) 敏怡第7，Angie第10。不過對於亞洲好多國家來說，香港訓練越野跑方面係夢幻嘅地方。」浩聰說。

「香港 trail running 嘅發展比亞洲其他地方較長同深入，佢哋可能突然有一粒star，ITRA 好高分，但其餘的跑手跟唔上，而香港的水平較平均，沒有斷層的問題。我觀察到 ITRA 分數幾能準確預測到能夠上 podium 的選手。」

未來要擔起頭家的Rex

U23組係今次亞錦賽香港的順風順水站，Rex (羅樂賢) 以1:32:12 (15.8K，攀升有1048米) 奪冠 (共有23位跑手)，以3分鐘時間力壓澳洲的 Ethan Penck，在冠軍的頒獎台站有一位來自香港的小伙子。他賽前以頭五為目標:「因為頭五有獎金。」唔洗查身份證，明顯流著香港人的血液。

Rex奪冠，點解我覺得15,000 USD隻font size大過U23嘅？

「Rex 今次係比賽過程對其他地方的選手有乜觀察? 例如上落坡，technical 方面。」

Rex 搲搲頭，想了一陣:「又冇乜，我一路都係前面，見唔到。」我哋一齊傻笑。
「有呀，見到其他國家跑手身型都比港隊高大，特別係澳洲選手，但唔覺佢哋乜有特別優勢。」
浩聰補充:「U23港隊平均年齡偏細，我哋又瘦又矮，上到頒獎台成班細路仔咁。」我哋第二次一齊傻笑。

「我哋從好細個開始訓練，港隊最細15歲，到 Rex 都只係20歲，但佢哋唔慢，名次都在中游。15歲果位最後批出 ITRA 分有六百三十幾。要提升 ITRA 分數其中一個策略，是 ITRA 高分嘅選手多落場，令較低分選手有機會拉近距離，甚至越過，咁整體積分就會提高。」在浩聰眼中，Rex 不久就要擔起頭家，可憐。

15歲的阿護是最細的港隊成員，回港後6K山賽奪冠，想不到Rex咁快已有接班人

最後我哋好興奮地吹下點搞吸睛嘅賽事，例如緊張刺激嘅短途賽，直跑上山頂嘅 sky running，可以航拍，方便直播，大家可能還記憶猶新今年7月的大山競走邀請賽，TPH 的 Angie 甄智貽與樂家的曾曉彤，在最後50米互片的刺激片段，相差不到14秒衝線，可以講足三年。

其實建造香港越野跑的拱門，不單要有好的材料 (起碼不會洩氣) 和靚靚的包裝設計，更重要是有班 Marvels，用心打進一股具靈魂和有溫度的生氣，把拱門豎立起來，召喚更多年青的、中年的、銀髮的，都跑來上線，go!

香港的區旗需由年青的一代飄揚，等待著他們衝過拱門

彩蛋

彩蛋？係喎，我放左係邊呢？

The post 外星人出哂，一定有古怪 | Janet Ng、聰sir和Rex從亞錦賽談建香港越野跑的拱門 appeared first on Fitz 運動平台.