要數到近期最hit嘅電視節目，除咗電視劇《延禧攻略》之外，當然要數到ViuTV真人騷《全民造星》，連CONY都有集集追。隨著節目走到白熱化階段，決賽都將於今個星期日舉行，好多參賽者雖然落敗，但依然贏到不少掌聲。好似曾以歌手身份出道，卻因為生計問題而變回一個普通打工仔，再因為呢個節目而重返舞台嘅阿神（曾贊學），雖然喺30強時被淘汰，不過就成功引來不少注目，不但有廣告同主持等工作，仲同朋友夾份開了一間日式餐廳，實行多元化發展。CONY今日路經觀塘，梗係去打探一下餐廳嘅虛實啦！
餐廳由阿神同另外3位朋友一齊夾份開，原來佢地一直都有開餐廳嘅念頭，剛好遇著有位世叔伯有舖位話可以畀佢地試下，加上佢地又好鍾意去日本旅行，食過好多唔同難忘嘅菜式，就開設了這家「峯日式料理」。
為了籌備得更好，更專程去日本當地請教一些餐廳的做法，返港再研究。雖然現時菜單款式不多，但都係佢地嘅私心推介，而且餐廳仍在起步階段，佢地想先專注做好現時嘅菜式，希望做到大家諗起觀塘邊度有石燒牛小排或者咖哩豬扒飯好食，都會第一時間諗起佢地。
餐廳位於熟食中心，走平民路線，午市套餐$50就有交易，佢地希望做到蔗渣價錢燒鵝味道，例如石燒牛小排選美國安格斯頂級牛肉，食落油份充足，口感香滑。而餐廳主打嘅蛋包飯喺香港好少見，以芝士融入蛋漿，呈半熟狀態，原來呢種風味係佢地在北海道品嚐過後，一試難忘，又見香港好少有，所以決定將呢種蛋包飯推出市場。
四人當中只有阿樹曾任職飲食行業，而Max一向喜歡下廚，所以廚房主要由二人負責，Manson和阿神則主要負責樓面。現時阿神若冇其他工作，就會到舖頭幫手，大家可以碰碰運氣，又或者如果想吃一頓經濟的日本料理，都可以考慮支持呢間小店。
峯日式料理
地址：觀塘駿業街駿業熟食市場1樓46號
電話：5428 8748
留言 0