喜歡吃意大利菜的人相信對8½ Otto e Mezzo Bombana不會陌生，這家位於中環的米芝蓮3星餐廳，由名廚Bombana主理，精緻菜式吸引大量捧場客。要嘆同具水準的米芝蓮級意大利菜，由Chef Bombana自己開設的Venedia Grancaffe亦不失為好選擇，餐廳以威尼斯風情Cafe為靈感，走性價比高的輕奢路線，他監督推出的全新薄餅系列最平$168就食到，最近又把意大利名產索倫托（Sorrento）檸檬入饌，帶來多款清新菜式，CONY慕名去試相當有驚喜，好適合成班朋友聚餐分享美食。
今次季節限定選用的索倫托檸檬是意大利南部Amalfi的特產，比一般檸檬大隻，出名肉甜多汁，檸檬皮帶有香氣亦沒有苦澀味，可以連皮食用。餐廳為索倫托檸檬設計了4款菜式，包括意式炸海鮮（$298）、法國生蠔（$458）、米蘭式小牛排（$588）及雪芭（$100）。
米蘭式小牛扒是一道經典的意大利菜，也是餐廳的招牌菜式。小牛扒經拍打至薄片，然後輕輕裹上麵包糠，炸至金黃酥脆，最後撒上索倫托檸檬汁及芝士，搭配芝麻菜沙律，平衡油膩口感。
甜品用上原個索倫托檸檬，餐廳自家製作雪芭再釀回檸檬中，外型有趣可愛，絕對是「打卡able」。雪芭味道清新純粹，未有覺得加入額外的糖去調味。雖然食落口感柔軟滑溜，雪芭卻壓得非常實淨，食極都仲有，令人特別滿足。
講起意大利又怎少得薄餅？餐廳最近特別添置高溫焗爐，並由Chef Bombana親自監督，用上來自當地的麵粉製作發酵48小時的麵團，令餅底更加煙靭酥脆。今次在6款pizza中揀選了拿坡里薄餅（Napoli）品嚐，以簡單配料襯托經醃製的鯷魚，突出其咸鮮香氣，味道又沒有過份複雜，多吃一塊都不會有負擔。
餐廳從開胃小菜、手工意粉、主菜到經典甜點都相當講究選取食材、烹調方法及配搭，還原正宗風味讓食客體驗傳統意大利菜精髓。CONY今次順道品嚐了幾道招牌菜式，為了管理身材特別麻煩了主廚每道菜都減少份量，所以以下相片可作參考，不代表實際份量的。
Venedia Grancaffe
地址：中環德輔道22號地下
時間：上午11時至凌晨12時
留言 0